सांगली : शहरातील शांतिनिकेतन परिसरातील अजिंक्यनगर येथे चोरट्यांनी घरफोडी करून दागिने आणि मोबाईल असा सुमारे सहा हजार २०० रुपयांचा मुद्देमाल लंपास केला. मंगळवार, दि. २० रोजी ही घटना उघडकीस आली. याप्रकरणी मारुती अरुण व्हनमाने (वय २८, रा. अजिंक्यनगर, सांगली) यांनी संजयनगर पोलीस ठाण्यात फिर्याद दिली आहे. पोलिसांनी अज्ञातावर गुन्हा दाखल केला आहे.
याबाबत पोलिसांनी दिलेली माहिती अशी, फिर्यादी व्हनमाने हे कुटुंबासह अजिंक्यनगर येथे राहत होते. सोमवारी ते शेतीकामासाठी आपल्या गावी गेले होते. यावेळी त्यांचे घर कुलूपबंद होते. चोरट्यांनी दरवाजाचे कुलूप तोडून घरात प्रवेश केला. घरातील साहित्य विस्कटून टाकले. घरात असलेल्या तिजोरीचे लॉक उचकटून त्यातील चांदीचे करदोडे, पैंजण, मोबाईल, लहान बाळाच्या दोन सोन्याच्या अंगठ्या असा सुमारे सहा हजार २०० रुपयांचा मुद्देमाल लंपास केला. मंगळवारी दुपारी व्हनमाने घरी परतल्यानंतर ही घटना उघडकीस आली.