आनंदा व विठ्ठल चाैगुले या सख्ख्या भावात शेतजमिनीच्या वाटणीचा वाद आहे. शेतात पेरणी करण्यापूर्वी शेतजमिनीची वाटणी करण्यासाठी दोघांत चर्चा सुरू असताना विठ्ठल याने शेताची मोजणी न करता, मी माझ्या शेतामध्ये पेरणी करणार, असे सांगितले. यावेळी आनंदा यांनी मोजणी झाल्याशिवाय पेरणी करायची नाही, असे म्हटल्याने विठ्ठल याने चिडून फावड्याने मारहाण केल्याची आनंदा चौगुले यांची तक्रार आहे. याबाबत मिरज ग्रामीण पोलिसांत नोंद आहे.
-------------------
मिरजेत महिलेच्या ५० हजारांच्या बांगड्या लंपास
मिरज : मिरजेत शासकीय रुग्णालयामागे दोन चोरट्यांनी स्मिता सतीश सुपनेकर यांची फसवणूक करून ५० हजार रुपये किमतीच्या सोन्याच्या बांगड्या घेऊन पोबारा केला.
सुपनेकर या सोमवार, दि.३१ मे रोजी रात्री ९.३० वाजता शासकीय रुग्णालयाच्या मागील रस्त्याने भारतनगरकडे जात होत्या. त्या एकट्याच असल्याचे पाहून दुचाकीवरील दोघांनी त्यांना अडविले. दोघांनी त्यांना पुढे दरोडा पडला आहे. तुमच्या बांगड्या सांभाळून ठेवा, असे सांगितले. यामुळे सुपनेकर यांनी हातातील बांगड्या काढल्यानंतर चोरट्यांनी त्यांच्या सोन्याच्या बांगड्या घेऊन पोबारा केला. फसवणूक झाल्याचे निदर्शनास आल्यानंतर त्यांनी गांधी चौक पोलीस ठाण्यात फिर्याद दिली. याप्रकरणी अज्ञात चोरट्यांविरुद्ध गुन्हा दाखल करण्यात आला आहे.
मिरजेत पत्र्याचे शेड चोरीस
मिरज : मिरजेतील एकता कॉलनीतील पत्र्याचे संपूर्ण शेड, विद्युत मीटर चोरट्यांनी लंपास केले. याबाबत जमीर मकबुल सनदी यांनी गांधी चौक पोलिसांत फिर्याद दिली आहे. सनदी यांनी एकता कॉलनी येथे पत्र्याचे शेड बांधून खोली तयार केली होती. दि.१६ मे ते दि.१ जूनदरम्यान अज्ञात चोरट्यांनी १२ हजार रुपये किमतीचे ३५ पत्रे असलेले संपूर्ण शेड व लाइट मीटर चोरून नेल्याचे सनदी यांनी फिर्यादीत म्हटले आहे.
मिरजेत किरकोळ कारणावरून एकावर चाकूहल्ला
मिरज : मिरज- मालगाव रस्त्यावरील अमननगर बसस्थानकाजवळ मंजूर सुलेमान शेख यांना मलिक मुराद पटवेगार याने चाकूने मारून गंभीर जखमी केले. मंगळवारी सायंकाळी मंजूर शेख हे त्यांच्या फॅब्रिकेशन दुकानाजवळ मित्रांसमवेत बोलत थांबले होते. त्यावेळी मलिक पटवेगार तेथे आला. शेख यांनी पटवेगार यास, तू दारू पिला आहेस, घरी जाऊन झोप, असे म्हटले. पटवेगार याने जास्त शहाणपणा करू नकोस, तू कोण मला बोलणार, असे म्हणत शेख यांच्या मानेवर चाकूने हल्ला केल्याची तक्रार आहे. चाकूहल्ल्यात शेख जखमी झाले असून, मिरज शहर पोलिसांत याबाबत नोंद आहे.