लोकमत न्यूज नेटवर्क
तासगाव : तासगाव नगरपालिकेचे वेध लागले असतानाच, शहरातील भाजपचे काही कार्यकर्ते शिवसेनेत दाखल झाले आहेत. मुंबई येथे शिवसेना नेते दिवाकर रावते आणि नगरविकास मंत्री एकनाथ शिंदे, संपर्कप्रमुख प्रा. नितीन बानुगडे पाटील यांच्या उपस्थितीत हा पक्ष प्रवेश झाला.
खासदार संजयकाका पाटील यांचे कट्टर समर्थक असणाऱ्या पहिल्या फळीतील नेत्यांनी काही महिन्यांपूर्वी शिवसेनेत प्रवेश केला होता. त्यानंतर तासगाव तालुक्यात शिवसेनेची मोर्चेबांधणी करण्यास चांगलीच सुरुवात झाल्याचे चित्र आहे. तासगाव नगरपालिकेची निवडणूक होणार आहे. या पार्श्वभूमीवर तासगाव शहरात शिवसेनेने लक्ष केंद्रीत केले आहे. तासगाव शहरातील भाजपचे कार्यकर्ते तसेच शहरात सामाजिक संस्थेचे काम करणारे काही पदाधिकारी यांनी मुंबई येथे शिवसेना नेत्यांच्या उपस्थितीत शिवबंधन बांधले.
हेल्पिंग हँड्स या सामाजिक संस्थेचे संस्थापक अध्यक्ष विशाल शिंदे, राजू मुल्ला, सुशांत पैलवान, प्रशांत पाटील, कृष्णात माळी यांनी शिवसेनेत प्रवेश केला. यावेळी शिवसेनेचे सांगली जिल्हाप्रमुख संजय विभुते, तासगावचे माजी नगराध्यक्ष अविनाश पाटील, पंचायत समितीचे माजी उपसभापती जयवंत माळी, आरोग्य कर्मचारी संघटनेचे राज्याध्यक्ष अरुण खरमाटे, सरपंच परिषदेचे जिल्हाध्यक्ष प्रदीप माने, शिवसेनेचे शहराध्यक्ष संजय चव्हाण उपस्थित होते.