म्हैसाळ ग्रामपंचायतीची निवडणूक अत्यंत चुरशीची झाली होती. मोहनराव शिंदे सहकारी साखर कारखान्याचे अध्यक्ष मनोज शिंदे-म्हैसाळकर यांच्याविरोधात भाजपचे सांगली शहर जिल्हाध्यक्ष दीपक शिंदे-म्हैसाळकर, पुष्पराज केदारराव शिंदे-म्हैसाळकर, दिलीप पाटील यांनी पॅनेल उभे केले होते. भाजपचे १७ पैकी १५, तर मनोज शिंदे-म्हैसाळकर गटाचे दोन सदस्य विजयी झाले होते. सरपंचपद खुले झाल्याने भाजपमध्ये सरपंच पदासाठी एकमत होऊ शकले नाही.
सरपंच पदासाठी रश्मी आबासाहेब शिंदे-म्हैसाळकर यांनी अर्ज दाखल केला. त्यांच्याविरोधात पुष्पराज केदारराव शिंदे-म्हैसाळकर यांनीही अर्ज दाखल केला. गुप्त पध्दतीने मतदानाची प्रक्रिया पार पडली. १५ सदस्यांनी मतदानाचा हक्क बजावला. मनोज शिंदे-म्हैसाळकर गटाचे दोन सदस्य गैरहजर राहिले. रश्मी शिंदे-म्हैसाळकर यांना नऊ, तर पुष्पराज शिंदे-म्हैसाळकर यांना सहा मते मिळाली.
नूतन सरपंचपदी निवड झाल्याबद्दल रश्मी शिंदे यांचा, तर उपसरपंचपदी निवड झाल्याबद्दल पद्मश्री पाटील यांचा सत्कार गणेश भांबुरे यांच्याहस्ते करण्यात आला.