ओळ : कुपवाड वृद्ध सेवाश्रम येथे विनायक लिमये यांचा जन्मशताब्दी सोहळा साजरा करण्यात आला. या वेळी माजी आमदार प्रा. शरद पाटील, नाना गोखले, डॉ. उदय जगदाळे, प्रकाश काळे आदीं उपस्थित होते.
लोकमत न्यूज नेटवर्क
कुपवाड : शहरातील वृद्ध सेवाश्रम येथे ‘डाय विथ डिग्निटी’ संघटनेचे सक्रिय कार्यकर्ते विनायक राजाराम लिमये यांच्या जन्मशताब्दीनिमित्त त्यांच्या प्रतिमेचे पूजन करून पुष्पहार अर्पण करण्यात आला. यावेळी माजी आमदार प्रा. शरद पाटील, लिमये यांचे नातेवाईक व नाना गोखले प्रमुख उपस्थित होते.
यावेळी प्रा. पाटील म्हणाले की, विनायक लिमये हे एक मनस्वी व्यक्तिमत्त्व होते. लहानपणीच आईवडलांचे निधन झाल्याने ते एकटेच राहत होते. या कारणामुळेच त्यांनी आयुष्यभर अविवाहित राहणे पसंद केले. लिमये यांनी इच्छा मरणासाठी प्रत्येकाला स्वातंत्र्य व अधिकार असावा या मागणीसाठी ‘डाय विथ डिग्निटी’ या संघटनेचे अनेक वर्षे सक्रिय कार्य केले होते. आत्महत्या करणे हा गुन्हा समजला जातो. त्यामुळे स्वेच्छामरणाचा अधिकार प्राप्त व्हावा यासाठी ते आयुष्यभर झगडले. लिमये यांनी वृद्धाश्रमाला पाच गुंठे प्लॉट दान म्हणून दिला आहे. अशा या मनस्वी, दानशूर व कोणीही नसलेल्या या व्यक्तिमत्त्वाचा आज जन्मशताब्दी सोहळा वृद्धासेवाश्रमात साजरा करण्यात आला.
या संस्थेच्या वतीने वर्षभर विविध कार्यक्रमाचे आयोजन करून त्यांना आदरांजली वाहण्याचे कामही संस्था करणार आहे. यावेळी लिमये यांचे नातेवाईक नाना गोखले यांनी मनोगत व्यक्त केले. प्रकाश काळे यांनी आभार मानले. संचालक अशोकराव पाटील यांनी सूत्रसंचालन केले. डॉ. उदय जगदाळे, शशिकांत गायकवाड, दादासाहेब पाटील, रमेश सायमोते, वि. द. बर्वे, रेखा माळी, आप्पा ओलेकर, वृद्धाश्रमातील सर्व आश्रित उपस्थित होते.