सांगली : वारणाली येथील महापालिकेच्या मल्टिस्पेशालिटी रुग्णालयाच्या कामाला अखेर सहा वर्षांनंतर मुहूर्त मिळाला आहे. न्यायालयीन वाद संपल्यानंतर, आता येत्या शनिवारी पालकमंत्री जयंत पाटील यांच्या हस्ते रुग्णालयाचे भूमिपूजन करण्यात येणार आहे.
महापालिकेत काँग्रेसची सत्ता असताना, राष्ट्रीय नागरी आरोग्य अभियानांतर्गत १० आरोग्य केंद्रे आणि कूपवाडसाठी हॉस्पिटल मंजूर झाले होते. त्यातील १० आरोग्य केंद्रे सुरूही झाली आहेत. मात्र, जागेच्या वादात वारणालीत मंजूर झालेले ५० बेडचे हॉस्पिटल रखडले होते. महापालिकेच्या स्वत:च्या जागेवर हे हॉस्पिटल मंजूर असून, त्यासाठी पाच कोटी रुपयांचा निधीही शासनाने मंजूर केला आहे.
दोन वर्षांपूर्वी महापालिकेत भाजपची सत्ता आल्यानंतर, कूपवाड गावठाणमध्येच हॉस्पिटल व्हावे, अशी महासभेत मागणी करण्यात आली. त्यानुसार, भाजपने वाघमोडेनगर येथे खासगी जागा विकत घेऊन तेथे हॉस्पिटल उभारणीचा ठराव महासभेत केला होता. राज्यात सत्तांतर झाल्यानंतर विष्णू माने यांनी पालकमंत्री जयंत पाटील यांच्याकडे वारणालीतच हॉस्पिटल होण्यासाठी आग्रही भूमिका घेतली. आयुक्त नितीन कापडणीस यांनी वाघमोडेनगरमधील जागेचा ठराव विखंडित करण्यासाठी शासनाकडे पाठविला. शासनाच्या नगरविकास मंत्रालयाने हॉस्पिटलच्या जागाबदलाचा ठराव नुकताच विखंडित केला. त्यातच जागेबाबत न्यायालयीन दावाही सुरू होता. हे दावे न्यायालयाने फेटाळून लावले आहेत. त्यामुळे रुग्णालय उभारणीची मार्ग मोकळा झाला असून, महापालिकेतील सत्ताधारी राष्ट्रवादीने भूमिपूजनाची तयारी सुरू केली आहे. येत्या शनिवारी पालकमंत्री पाटील यांच्या हस्ते भूमिपूजन केले जाणार असल्याचे शहर जिल्हाध्यक्ष संजय बजाज यांनी सांगितले.
चौकट
निविदाही प्रसिद्ध
आयुक्त कापडणीस यांनी हॉस्पिटलचा आराखडा तयार करून, त्याच्या उभारणीची निविदा जाहीर केली होती. यामध्ये चार कोटी ४५ लाख ६१ हजार ५२३ रुपये खर्च अपेक्षित धरला आहे. ऑनलाइन निविदा मागविल्या होत्या. या निविदा उघडून ठेकेदाराला वर्कऑर्डरही देण्यात आल्याचे प्रशासनाने सांगितले.