लोकमत न्यूज नेटवर्क
शिराळा : येथील प्रा. डॉ. शिल्पा कुरणे यांना जायंट्स वेल्फेअर फौंडेशनकडून विविध पुरस्कारांनी सन्मानित करण्यात आले. जायंट्स वेल्फेअर फौंडेशन २ क, युनिट ३ च्या वतीने पुरस्कार वितरण आयोजित करण्यात आले होते. जायंट्स वेल्फेअर फौंडेशनचे केंद्रीय समिती सदस्य डॉ. सतीश बापट, विशेष समिती सदस्य रामनारायण उंटवाल हे प्रमुख पाहुणे म्हणून उपस्थित होते. यावेळी जायंट्स ग्रुप ऑफ शिराळा हिरकणीच्या अध्यक्ष डॉ. शिल्पा कुरणे यांना ‘आउटस्टँडिंग प्रेसिडेंट अवॉर्ड’ पुरस्काराने सन्मानित करण्यात आले. तसेच डॉ. कुरणे यांच्या कार्यकुशलतेबद्दल जायंट्स हिरकणीला ‘आउटस्टँडिंग अँड बेस्ट ग्रुप ऑफ दि इयर’ अवॉर्ड देऊन सन्मानित करण्यात आले. या कार्यक्रमास फेडरेशन डायरेक्टर भूषण शहा, युनिट ऑफिसर श्रद्धा कुलकर्णी, माजी अध्यक्ष संगीता शहा, कविता शहा, यंग जायंट्सचे विशाल खुर्द व जायंट्स हिरकणीचे सदस्य उपस्थित होते.