बोरगाव : कृष्णा कारखान्याची एकहाती सत्ता प्रस्थापित करण्यासाठी मनोमिलन हाच योग्य पर्याय होता. मी मनोमिलनाबाबत सर्व बाजूंनी तडजोड केली होती. पण पडद्यामागून सुत्रे हाकणाऱ्या काही विघ्नसंताेषी माणसांनी हे प्रयत्न उधळून लावल्याचा आरोप रयत पॅनलचे प्रमुख डाॅ. इंद्रजित मोहिते यांनी केला.
बोरगाव (ता. वाळवा) येथे रयत पॅनलच्या प्रचाराचा प्रारंभ व सभासद संपर्क दाैऱ्यात ते बाेलत हाेते. इंद्रजित मोहिते म्हणाले, कृष्णा कारखाना हा सभासदांच्या हक्काचा राहावा, यासाठी आम्ही संस्थापक पॅनलशी तडजोडीला तयार होताे. पण कोणी कोणाचे किती ऐकायचे यालाही मर्यादा हव्यात. स्वतःची निर्णयक्षमता बाजूला ठेवून दुसऱ्यांच्या सल्ल्यानुसार घेतलेले निर्णय हे नेहमी विनाशाचे कारण ठरतात. कृष्णा कारखाना सभासदांचा ठेवण्यासाठी सहकार व संस्थापक पॅनलला सत्तेपासून दूर ठेवायला हवे.
रयत पॅनलच्या माध्यमातून यशवंतराव मोहिते यांच्यापासून या कारखान्यात सभासदांच्या हिताचे निर्णय घेतले गेले आहेत. कृष्णेचे सभासद सुज्ञ आहेत. त्यामुळे सभासद या निवडणुकीत लबाड व भ्रष्टाचाऱ्यांना त्यांची जागा दाखवतील. विजय हा आता रयत पॅनलचाच आहे.
यावेळी मोहिते यांनी घरोघरी जाऊन सभासदांची भेट घेतली. ‘रयत’ला मतदानासाठी विनंती केली. यावेळी प्रा. अनिल पाटील. डाॅ. नितीन पाटील, विकास पाटील, विलास शिंदे, बैजू पाटील उपस्थित हाेते.
फोटो : २१ बाेरगाव १..२
ओळी : बोरगाव (ता. वाळवा) येथे रयतच्या प्रचार दाैऱ्यात इंद्रजित मोहिते, अनिल पाटील, डाॅ. नितीन पाटील सहभागी झाले हाेते.