कुपवाड : शहरातील जोगेंद्र शामदेव पासवान (सध्या रा. गल्ली नं. एक उमेदनगर, कुपवाड, मूळगाव झारखंड) या तरुणावर गुरुवारी रात्री दारूच्या नशेत एका तरुणाने कटरने प्राणघातक हल्ला केला. पासवान याच्यावर सांगलीतील शासकीय रुग्णालयात उपचार सुरू आहेत. या घटनेची कुपवाड एमआयडीसी पोलीस ठाण्यात नोंद झाली आहे.
अभिषेक मदन गुरव (वय २१, उमेदनगर, भारत सूतगिरणीजवळ, कुपवाड) असे गुन्हा दाखल झालेल्या संशयिताचे नाव आहे. जखमी पासवान व त्याचा मित्र उमेदनगर येथे गुरुवारी रात्री जेवण करीत बसले होते. यावेळी संशयित अभिषेक गुरव हा दारूच्या नशेत त्यांच्याजवळ येऊन बडबडत असताना पासवान याने त्यास घरी जाण्यास सांगितले. मला घरी जाण्यास का सांगितलस असे म्हणून त्याने आपल्या जवळच्या कटरने त्याच्या छातीवर प्राणघातक हल्ला करून गंभीर जखमी केले.
हल्ल्यानंतर संशयित फरार झाला. जखमीला त्याच्या मित्रांनी सांगलीतील सिव्हिल हॉस्पिटलमध्ये दाखल केले. त्याच्यावर उपचार सुरू आहेत. याबाबत जखमी पासवान याने संशयित गुरव याच्याविरोधात कुपवाड एमआयडीसी पोलीस ठाण्यात तक्रार दाखल केली आहे. त्यानुसार पोलिसांनी त्याच्या विरोधात गुन्हा दाखल केला आहे.