आष्टा : आष्टा बसस्थानकातील शौचालयाचा तसेच परिसराचा लोकवर्गणीतून कायापालट करण्यात येणार आहे. बापूसाहेब शिंदे सेवाभावी संस्था व इतर सहकारी संस्थांनी या कामाला नूतन वर्षाच्या मुहूर्तावर सुरुवात केली.
शौचालयाच्या नूतनीकरण कामाचे उद्घाटन राज्य परिवहन मंडळाच्या सांगली विभागाचे विभागीय अभियंता श्रीकांत सूर्यवंशी, अभियंता अरुण वाघारे, इस्लामपूर आगाराच्या व्यवस्थापक शर्मिष्ठा घोलप-पाटील यांच्या हस्ते झाले.
सांगली-पेठ मार्गावरील आष्टा बसस्थानक परिसरातील प्रवाशांसाठी अत्यंत उपयुक्त आहे. आष्टा-कोल्हापूर, तासगाव, आष्टा-सांगली ,आष्टा-मुंबई या मार्गावर जाणाऱ्या सर्व एस.टी. बसेस आष्टा बस स्थानकात येतात. मात्र, या बसस्थानकातील शौचालयांची अवस्था अत्यंत दयनीय झाली आहे. या स्वच्छतागृहांच्या दुरुस्तीसाठी बापूसाहेब शिंदे सेवाभावी संस्थेसह विविध संस्थांनी पुढाकार घेतला आहे तसेच बसस्थानक परिसरात झाडे लावून बगीचा तयार करण्यात येणार आहे.
यावेळी कनिष्ठ अभियंता विजय रुपनर, लालासाहेब देसाई ,वाहतूक नियंत्रक कुमार माळी, शंकरराव कदम, संग्राम शिंदे, बाबासाहेब भोपे, अशोक मदने, शहाजान जमादार, वसंत कांबळे, महादेव झांबरे, सेवानिवृत्त एस. टी. कर्मचारी संघटनेचे अब्बास लतीफ, सिराज मुजावर मारुती सावंतसह मान्यवर उपस्थित होते.
कोट
आष्टा बसस्थानक परिसरात पुरुष व महिला स्वच्छतागृह आहे. मात्र, या ठिकाणी घाणीचे साम्राज्य पसरले असल्याने प्रवाशांना दुर्गंधीचा सामना करावा लागत आहे. शहरातील विविध सामाजिक संस्थांच्या वतीने सामाजिक जबाबदारी समजून बसस्थानक स्वच्छतागृहांचे नूतनीकरण व बगीच्याचे काम हाती घेतले असून या कामाला सर्वांनी मदत करावी.
- संग्राम शिंदे, अध्यक्ष, बापूसाहेब शिंदे सेवाभावी संस्था
फोटो-०१आष्टा१
फोटो ओळ : आष्टा बसस्थानक सुशोभीकरण कामाच्या उद्घाटनप्रसंगी सांगली विभागाचे विभागीय अभियंता श्रीकांत सूर्यवंशी, अभियंता अरुण वाघाटे, इस्लामपूर आगाराच्या व्यवस्थापक शर्मिष्ठा घोलप-पाटील आदी उपस्थित होते.