सांगली : जिल्ह्यात कोरोना स्थिती नियंत्रणात असली तरी राज्यात वाढत असलेल्या कोरोनाबाधितांच्या संख्येमुळे जिल्ह्यातही खबरदारी घेण्यात येत आहे. जिल्ह्यामध्ये मंगल कार्यालयामध्ये तसेच इतर ठिकाणी कार्यक्रम सुरू असून मोठ्या प्रमाणावर लोकांची गर्दी केली जात आहे. त्यामुळे प्रादुर्भाव रोखण्यासाठी व तपासणी करण्यासाठी शहरासह तालुका पातळीवर स्वतंत्र पथके तयार करण्यात आली आहेत. याबाबतचे आदेश जिल्हाधिकाऱ्यांनी जारी केले आहेत.
जिल्हाधिकारी डॉ. चौधरी यांनी सांगितले की, कोरोना नियंत्रणासाठी राबविण्यात येत असलेल्या उपाययोजनांसंदर्भात पथके तयार करण्यात आली आहेत. मंगल कार्यालये, कोचिंग क्लासेस, बाजार, मंडई, रेस्टॉरंट तसेच अन्य गर्दीच्या ठिकाणी मर्यादित लोकांची उपस्थिती, मास्क, सॅनिटायझर यांचा वापर, योग्य सामाजिक अंतर याबाबतची तपासणी या पथकाद्वारे होणार आहे.
पोलीस, जिल्हा परिषद प्रशासन व तालुका पातळीवर तहसीलदारांना याबाबतचे अधिकार देण्यात आले आहेत. नियमांचे उल्लंघन करणाऱ्यांवर कडक कारवाईचे आदेश देण्यात आल्याचेही त्यांनी सांगितले.