शिराळा : औंढी (ता. शिराळा) ग्रामपंचायत सरपंचपदी भाजपच्या आक्काताई दिनकर गुरव यांची बिनविरोध निवड झाली आहे. सर्वसाधारणपदासाठी याठिकाणी जागा असताना महिलादिनाची या महिलेस भेटच म्हणावी लागेल.
या ग्रामपंचायतीचे तत्कालीन लोकनियुक्त सरपंच अभय पाटील यांना विशेष ग्रामसभेत अविश्वास ठराव संमत झाल्यामुळे सरपंचपद रिक्त होते. मंगळवारी निवडणूक निर्णय अधिकारी आर. एस. कानडे यांच्या अध्यक्षतेखाली झालेल्या सरपंच निवडणुकीमध्ये आक्काताई गुरव यांची निवड बिनविरोध झाली. सदर ग्रामपंचायतीमध्ये माजी राज्यमंत्री शिवाजीराव नाईक यांच्या गटाचे बहुमत आहे. आक्काताई गुरव या राष्ट्रवादी पक्षाच्या सदस्य होत्या. तत्कालीन सरपंचांच्या मनमानी कारभारला कंटाळून त्यांनी भाजपमध्ये प्रवेश केला. आक्काताई गुरव यांच्या पाठिंब्यामुळेच लोकनियुक्त सरपंचांवर अविश्वास ठराव संमत होऊ शकला.
वास्तविक औंढी गावचे सरपंचपद हे खुले होते. आक्काताई गुरव यांनी माजी आ. नाईक गटात प्रवेश केल्याचे बक्षीस म्हणून युवा नेते सत्यजित देशमुख, रणधीर नाईक यांनी त्यांना सरपंचपद दिले.
यावेळी उपसरपंच शिवाजी कांबळे, सदस्य दिलीप लोहार, पल्लवी खोत उपस्थित होते.