विट्याजवळ अपघात, एक ठार

दोघे जखमी, पुतण्या बचावला

 विटा : भरधाव दुचाकींची समोरासमोर धडक होऊन एक ठार, तर दोघेजण गंभीर जखमी झाले. ही घटना शुक्रवारी रात्री नऊच्या सुमारास विटा-कºहाड रस्त्यावरील शिवतेज ढाब्यासमोर घडली. गोरख सीताराम जगताप (६५, रा. वडियेरायबाग, भगतमळा, ता. कडेगाव) असे अपघातात ठार झालेल्या वृध्दाचे नाव आहे. या अपघातात कृष्णत पोपट कदम (३५, रा. वडियेरायबाग) व सुनील प्रकाश बुधावले (२०, रा. सावळज, ता. तासगाव, सध्या रा. विटा) गंभीर जखमी झाले. वडियेरायबाग (भगतमळा) येथील गोरख जगताप व कृष्णत कदम शुक्रवारी कामानिमित्त विट्याला आले होते. काम संपवून रात्री पावणेनऊच्या सुमारास त्यांच्या दुचाकीवरून (क्र. एमएच १०बीटी ३१५८) भगतमळा येथे घरी चालले होते. त्यावेळी पोल्ट्री कामगार असलेले सुनील बुधावले व त्यांचा नऊ वर्षाचा पुतण्या अभिजित मारुती बुधवाले हे दोघेजण दुचाकीवरून (क्र. एमएच १०एके ६५२९) विट्याकडे निघाले होते. शिवतेज ढाब्याजवळ या दोन गाड्यांची समोरासमोर धडक झाली. त्यात गोरख जगताप, कृष्णत कदम व सुनील बुधावले गंभीर जखमी झाले. विटा पोलिसांनी घटनास्थळी धाव घेऊन जखमींना सांगलीच्या खासगी रुग्णालयात दाखल केले. जगताप यांचा उपचार सुरू असताना मृत्यू झाला. बुधावले व कदम यांच्यावर खासगी रुग्णालयात उपचार सुरू आहेत. मृत गोरख जगताप शेतकरी असून, त्यांच्या पश्चात आई-वडील, पत्नी, दोन मुले, सून, भाऊ असा परिवार आहे. (वार्ताहर)