सांगली : महाराष्ट्र शासनाच्या यंदाच्या अर्थसंकल्पात सांगली, मिरज, कुपवाड महापालिकेसाठी खास निधी म्हणून २०० कोटींचा निधी मंजूर करावा, अशी मागणी राष्ट्रवादीचे प्रदेश उपाध्यक्ष व 'व्हिजन सांगली' फोरमचे मुख्य समन्वयक सुरेश पाटील यांनी जयंत पाटील यांच्याकडे निवेदनाद्वारे केली आहे.
सुरेश पाटील यांनी सांगितले की, नुकतीच महापौर निवडीच्या माध्यमातून राष्ट्रवादी व काँग्रेस पक्षाने एकत्रित येत भाजपच्या महापालिकेतील सत्तेला सुरूंग लावत जयंत पाटील यांच्या नेतृत्व व मार्गदर्शनाखाली मोठया दिमाखात सत्ता काबीज केली. येणाऱ्या अडीच वर्षामध्ये राज्य शासनाच्या सहकार्याने महापालिका क्षेत्राचा पूर्ण विकास करणे गरजेचे आहे. यासाठी महाराष्ट्र शासनाच्या यंदाच्या बजेटमध्ये महापालिकेसाठी खास निधी म्हणून २०० कोटींचा निधी मंजूर करून देण्यात यावा.
भारतीय जनता पक्षाची राज्यात सत्ता असताना मुख्यमंत्री फडणवीसांनी सांगली महानगरपालिकेची सत्ता बीजेपीकडे आल्यानंतर १०० कोटी रुपयांचा निधी महापालिकेस बक्षीस स्वरूपात दिला होता. या सत्ताबदलाचे फळ म्हणून यंदाच्या बजेटमध्ये या महापालिकेसाठी किमान २०० कोटींचा निधी बक्षीस स्वरूपात देण्यासाठी तरतूद केल्यास, पुढच्या दोन वर्षांमध्ये प्रलंबित व नवीन कामे पूर्ण करता येतील. प्रस्तावित कामांमध्ये शेरीनाला, ड्रेनेज, शहरातील गुंठेवारी भागातील रस्ते, नवीन डांबरी रस्ते, तसेच नवीन डीपी प्लॅन, रस्ते, कुपवाड शहरातील हॉस्पिटल, उद्यान, तसेच खुल्या ओपन स्पेस असणाऱ्या जागांना तारेचे कंपाऊंड,
छोटी उद्याने, काळी खण, नवीन प्रस्तावित उद्याने, स्पोर्टस कॉम्प्लेक्स, ट्रक टर्मिनस, सुसज्ज नाटयगृह, वॉर्डनिहाय व्यायामशाळा, ग्रंथालय अशी अनेक कामे करता येतील. त्याचा दोन वर्षाचा मास्टर प्लॅ॑न जर आपण बनवून त्याप्रमाणे कार्य केले, तर संपूर्ण कामे पूर्णत्वास जाणे शक्य होईल. यासाठी महापालिकेस हा निधी मंजूर करून द्यावा.