दापोली : दापोली बसस्थानकासमोरील राणी कॉम्प्लेक्स आवारात झाड तोडत असताना विजेचा सिमेंटचा खांब इमारतीवर पडला. मात्र, वीजवाहिनी बंद असल्याने तसेच परिसरात कुणीही व्यक्ती नसल्याने कोणतीही जीवितहानी झाली नाही.
पावसाळा तोंडावर आल्याने वीजवाहिन्यांना चिकटणारी झाडे तोडली जात आहेत. या अशा कामासाठी महावितरण कंपनीकडून ठेका पद्धतीवर काही कामगार नेमण्यात आले आहेत. हे कामगार पावसाळी नियोजनाने राणी कॉम्प्लेक्स येथे झाड तोडण्याचे काम महावितरणकडून सुरू होते. मात्र झाड जमिनीवर कोसळत असताना विजेच्या वाहिनीवर पडला. विजेच्या वहिनीला मोठा धक्का बसून सिमेंटचा विजेचा खांब मध्येच मोडून कोसळला. त्यामुळे या परिसरातील नागरिकांना अंधारात राहावे लागले. मात्र महावितरणकडून दुसऱ्या दिवशी सदर वीज खांब उभा करून वीजपुरवठा सुरळीत करण्यात आला. या इमारतीमध्ये दिलीप रूपारेल यांचा दुकानाचा गाळा आहे. या दुकानाच्या समोरील शेडवर हा वीज खांब पडल्याने नुकसान झाल्याचे त्यांनी सांगितले.