खेड : मुंबई-गोवा महामार्गावरील मोरवंडे शाळा येथे भरधाव वेगातील डंपरने दुचाकीला धडक दिल्याने दुचाकीस्वार गंभीर जखमी झाला आहे़ विजय कृष्णा मोहिते (वय ४८) असे दुचाकीस्वाराचे नाव असून, तो चिपळूण तालुक्यातील तळसर मुंडे येथील रहिवासी आहे. रविवारी सकाळी ११ वाजण्याच्या सुमारास हा अपघात रस्ता निसरडा झाल्याने घडल्याचे प्रत्यक्षदर्शींनी सांगितले. मोहिते यांच्या डोक्यात हेल्मेट असल्याने अनर्थ टळला.
घटनास्थळावरून मिळालेल्या माहितीनुसार चिपळूण तालुक्यातील तळसर येथे राहणारे विजय कृष्णा मोहिते हे आपल्या दुचाकीवरून चिपळूण येथून खेडकडे येत होते. त्याची दुचाकी मोरवंडे शाळेसमोर आली असता समोरून येणारा डंपर पावसामुळे निसरडा झालेल्या रस्त्यावरून घसरला आणि हा अपघात झाला.
अपघाताची माहिती मिळताच हायवे मृत्युंजय दूत प्रसाद गांधी, रोहन इनरकर आणि अतुल जोशी रुग्णवाहिकेसह घटनास्थळी दाखल झाले. अपघातात जखमी झालेले माेहिते यांना चिपळूण येथील खासगी रुग्णालयात दाखल केले. सध्या मोहिते यांच्यावर रुग्णालयात उपचार सुरू आहेत. या प्रकरणी अधिक तपास खेड पोलीस करीत आहेत.
----------------------------
मुंबई-गाेवा महामार्गावर खेड तालुक्यातील मोरवंडे येथे दुचाकीला डंपरने धडक दिल्याने अपघात झाला़