रत्नागिरी : दुचाकी अपघातप्रकरणी एका तरुणाविरोधात ग्रामीण पोलीस ठाण्यात गुन्हा दाखल करण्यात आला आहे. हा अपघात गुरुवारी (दि. २४) दुपारी १२.१५ वाजण्याचा सुमारास निवळी ते जयगड जाणाऱ्या रस्त्यावर तरवळ येथे घडला.
कैलास विष्णू मुंडेकर (वय २१, रा. भातगाव, गुहागर ) असे गुन्हा दाखल करण्यात आलेल्या चालकाचे नाव आहे. वृषाली रवींद्र आंबेकर (२२, रा. फणसवळे रत्नागिरी ) या तरुणीचा अपघातात मृत्यू झाला. वाहन चालविण्याचा परवाना नसतानाही कैलास त्याचा भाऊ विशाल याची दुचाकी (एमएच-०८-यू -८२७९) घेऊन वृषालीसोबत फणसवळे करबुडेमार्गे निवळी ते जाकादेवी जात होता. तो तरवळ येथील इंद्रधनू हॉटेलजवळ आला असता त्याने अचानक ब्रेक दाबला. त्यामुळे गाडीचे मागील चाक निखळून त्यांचा अपघात झाला. यात वृषालीच्या डोक्याला गंभीर दुखापत झाल्याने तिचा मृत्यू झाला. या प्रकरणी कैलासवर गुन्हा दाखल झाला असून, अधिक तपास साहाय्यक पोलीस फौजदार टेमकर करीत आहेत.