रत्नागिरी : धान्य घेऊन जाणाऱ्या ट्रकचे ब्रेक फेल हाेऊन निवळी (ता. रत्नागिरी) येथे मंगळवारी दुपारी १२.१५ वाजता अपघात झाला. या अपघातात चालक श्रीराम शशिकांत प्रसादे (५२, रा. देवरूख) याचा जागीच मृत्यू झाला.
पोलिसांनी दिलेल्या माहितीनुसार मंगळवारी दुपारी श्रीराम शशिकांत प्रसादे हा ट्रक (एमएच ०४, ईवाय ९२०३) मध्ये निवळी येथील मासेबाव गोडाऊनमधील धान्य घेऊन संगमेश्वरकडे जात हाेते. निवळी येथील दत्तमंदिर येथील वळणात आल्यानंतर त्याचा गाडीवरील ताबा सुटला. त्याला गाडीवर नियंत्रण मिळवता न आल्याने गाडी समाेरील डाेंगरावर जाऊन आदळली. त्यामध्ये गाडीच्या समाेरील भागाचा चक्काचूर झाला. ब्रेक फेल झाल्याने हा अपघात झाल्याचा प्राथमिक अंदाज पाेलिसांनी व्यक्त केला आहे.
या अपघाताची माहिती मिळताच ग्रामीण पोलीस निरीक्षक विनीत चौधरी, पोलीस उपनिरीक्षक पूजा चव्हाण, पोलीस हेडकाॅन्स्टेबल संतोष कांबळे, अजय कांबळे व संजय झगडे यांनी घटनास्थळी जाऊन पाहणी करून पंचनामा केला. पुढील तपास पोलीस उपनिरीक्षक पूजा चव्हाण करीत आहेत. धान्य घेऊन जाणाऱ्या ट्रकला अपघात झाल्याचे कळताच प्रभारी जिल्हा पुरवठा अधिकारी ऐश्वर्या काळुसे यांनीही घटनास्थळी भेट दिली.