राजापुरात काँग्रेसचे आंदोलन झालेच नाही

समन्वयाचा अभाव : स्थानिक पदाधिकाऱ्यांना कोणतीच कल्पना नसल्याचे उघड

राजापूर : आपल्या कारभाराचे १०० दिवस पार करणाऱ्या फडणवीस सरकारच्या अपयशाविरुद्ध राज्यभर रास्तारोको करण्याचा निर्णय काँग्रेसच्या वरिष्ठ स्तरावरुन घेण्यात आला असताना, त्याबाबत राजापूर तालुका काँग्रेसलाच कोणत्या प्रकारची कल्पना न देण्यात आल्याने, ९ फेब्रुवारीला राजापुरात काँग्रेसचे रास्तारोको ओदोलन होऊच शकले नाही.राज्यातील सत्तांतरानंतर युतीचे सरकार राज्यात सत्तेवर आले. सरकारने कारभाराचे शंभर दिवस ९ फेब्रुवारीला पार केले. मात्र या कालखंडात सरकारने समाधानकारक कामे केली नाहीत व सर्वच आघाड्यांवर ते सपशेल आपटले, अशी जोरदार टीका काँग्रेसकडून करण्यात आली. ९ फेब्रुवारीलाच या सरकारच्या कारभाराविरुद्ध ठिकठिकाणी रास्तारोको करण्याचा निर्णय पक्षाच्या वरिष्ठ स्तरावरुन पार पडलेल्या बैठकीत घेण्यात आला होता व त्याबाबतच्या सूचना प्रत्येक जिल्हा व तालुका कार्यकारिणीला देण्याचे ठरले होते. त्यानुसार काँग्रेसचे प्रदेश प्रवक्ते व राजापूरचे सुपुत्र हरीश रोग्ये यांनी राजापुरात पत्रकार परिषद घेऊन फडणवीस सरकारवर तुफान टीका केली होती. मात्र, या काँग्रेस प्रवक्त्यांनी आपल्या पदाधिकारी व कार्यकर्त्यांना कदाचित नियोजित आंदोलनाची माहिती न दिल्याने ९ तारखेचे आंदोलन होऊ शकले नाही.याबाबत तालुका काँग्रेसचे अध्यक्ष रवींद्र नागरेकर हेच आंदोलनाबाबत अनभिज्ञ असल्याचे दिसले. ८ फेब्रुवारीला रात्री त्यांना राजापूर पोलीस ठाण्याकडून आंदोलनाबाबत विचारणा करण्यात आली. त्यावेळी असे काही आंदोलन पक्षाने घेतले, त्याची त्यांना पुसटशी देखील कल्पना नव्हती. त्यामुळे तेच आश्चर्यचकीत झाले. वरिष्ठ पातळीवरुन पक्ष पदाधिकारी व कार्यकर्ते यांना कसलीच कल्पना दिली गेली नाही. त्यामुळे ९ तारखेला काँग्रेसचे कुणीही हजर राहिले नव्हते.देशभरामध्ये विविध निवडणुकांत सातत्याने पराभवाचा सामना करणाऱ्या काँग्रेसची अवस्था राजापूर तालुक्यातही फारच सोचनीय झाली आहे. नियोजित आंदोलनाची उशिरा खबर मिळून देखील त्यांनी आंदोलन न छेडणे यावरुन त्या पक्षाची झालेली जोरदार पिछेहाट दिसून आलीच. शिवाय पक्षांतर्गत नाती आलबेल नसल्याचेही पुढे आले आहे. या सर्व परिस्थितीत पक्षाची घसरण होत असल्याचेच पुढे येत आहे. (प्रतिनिधी)