रत्नागिरी : रत्नागिरी मध्यवर्ती बसस्थानकाचे रखडलेले बांधकाम आणि गणेशोत्सवाच्या पूर्वी शहरातील रस्ते सुधारणा करण्याप्रश्नी महाराष्ट्र समविचारी मंचच्या वतीने येत्या २ ऑगस्ट रोजी थाळीनाद आंदोलन करण्यात येणार आहे.
रत्नागिरी येथील मध्यवर्ती बस स्थानकाचे बांधकाम गेली अनेक वर्षे रखडलेले आहे. कोकणातील लोकप्रिय असा गणेशोत्सव दीड महिन्यांवर आलेला आहे. असे असतानाही शहरातील रस्ते दुरुस्त करण्यात आलेले नाहीत. नागरिकांना अजूनही या खडतर रस्त्यांवरून वाहने न्यावी लागत आहेत. शहरातील अनेक प्रश्नांच्या सोडवणुकीसाठी तसेच याविषयी संबंधितांचे लक्ष वेधण्यासाठी महाराष्ट्र समविचारी मंचच्या वतीने रत्नागिरीतील बस स्थानकासमोर सोमवार, २ ऑगस्ट रोजी सकाळी ११ ते १ या वेळात थाळीनाद आंदोलन करण्यात येणार आहे.
सध्या रत्नागिरी शहरातील अनेक प्रश्न जनतेच्या जिव्हाळ्याचे असून याविषयी जनतेच्या मनात असंतोष खदखदत आहे. समविचारीने नि:पक्षतेने आयोजित केलेल्या या आंदोलनात रत्नागिरीकर, समाजसेवक, विविध सामाजिक कार्यकर्ते, संस्था, संघटना यांनी बहुसंख्येने सहभागी व्हावे, असे आवाहन महाराष्ट्र समविचारी मंचाच्या वतीने करण्यात आले आहे.