चिपळूण : कोरोनाच्या पार्श्वभूमीवर सुरु असलेल्या विकेंड लॉकडाऊनमुळे गुरुवारी संपूर्ण बाजारपेठ कडकडीत बंद होती. यानिमित्ताने शहर व परिसरात पोलीस बंदोबस्त ठेवण्यात आला आहे. सर्वच दुकाने व व्यवसाय बंद असल्याने बाजारपेठ सुनीसुनी झाली होती. तरीही काही दुचाकीस्वार व वाहनधारक अत्यावश्यक वस्तूंच्या नावाखाली बाहेर पडल्याने त्यांच्यावर दंडात्मक कारवाई करण्यात आली.
संचारबंदीत नागरिकांनी विनाकारण घराबाहेर पडू नये, असे आवाहन प्रशासनाने आधीच केले होते. तसेच नगर परिषदेनेही शहरात रिक्षा फिरवून बाजारपेठेतील व्यापाऱ्यांना व नागरिकांना दोन दिवसांच्या कडक लॉकडाऊन विषयी आवाहन केले होते. त्याला गुरुवारी येथील व्यापारी व नागरिकांनी तितक्याच उत्स्फूर्तपणे प्रतिसाद दिला. बाजारपेठेत मेडिकलचे दुकान वगळता अन्य सर्व दुकाने बंद होती.
या लॉकडाऊनच्या पार्श्वभूमीवर पोलिसांनी मागील लॉकडाऊन प्रमाणे शहरात ठिकठिकाणी बॅरिकेटस उभारून सर्व सीमा सील केल्या आहेत. तसेच शहरातील उक्ताड, नाईककंपनी बजारपूल, फरशी तिठा, चिंचनाका, पाग देसाई बाजार, बहाद्दूर शेख नाका या ठिकाणी तंबू उभारुन पोलीस बंदोबस्त ठेवला आहे.
दुपारच्या वेळी काही नागरिक अत्यावश्यक सेवेच्या नावाखाली बाहेर पडल्याने त्यांच्यावर कारवाई केली. विशेषतः चिंचनाका येथे १५ हून अधिक वाहनधारकांवर दंडात्मक कारवाई करण्यात आली. उपविभागीय पोलीस अधिकारी सचिन बारी, पोलीस निरीक्षक देवेंद्र पोळ यांच्या नेतृत्वाखाली सर्वत्र पोलीस बंदोबस्त ठेवण्यात आला होता. तसेच प्रांताधिकारी प्रवीण पवार, तहसीलदार जयराज सूर्यवंशी, मुख्याधिकारी डॉ. वैभव विधाते संपूर्ण परिस्थितीवर नियंत्रण ठेवून आहेत.
--------------------------------
चिपळूण शहरातील नेहमी गजबजणारा व गर्दीचे ठिकाण म्हणून ओळखला जाणारा बाजारपेठेतील चिंचनाका परिसर लॉकडाऊनमुळे सुनासुना झाला आहे़