लोकमत न्यूज नेटवर्क
चिपळूण : तालुक्यातील गोंधळे येथील जंगलात अत्यंत दुर्मीळ असणारा शॅमेलियन सरडा आढळला. याबाबत येथील तरुणांनी तत्काळ वर्ल्ड फॉर नेचर संस्थेला कल्पना दिली असता, संस्था सदस्यांनी तत्काळ गोंधळे जंगलात येत रेस्क्यू करून सुरक्षितपणे या सरड्याला नैसर्गिक जंगलात सोडले. गोंधळे येथील जंगलात हा सरडा सापडल्याने वनसंपत्ती आणि वन्यजीव अभ्यासासाठी हे जंगल महत्त्वपूर्ण ठरणार असल्याचे वर्ल्ड फॉर नेचर सदस्यांचे म्हणणे आहे.
तालुक्यात अनेक मोठी जंगले असून, त्यामध्ये विविध वन्यजीव व प्राणी आढळतात. काही वन्यप्रेमी, निसर्गमित्र याठिकाणी वनसंपत्ती व वन्यजीवांचे संशोधन आणि अभ्यास करण्यासाठी येत असतात. यापूर्वी अनेकवेळा येथे दुर्मीळ जातीचे पक्षी, प्राणी आढळले आहेत. पण आता अत्यंत दुर्मीळ जातीचा व कोकणात न आढळणारा असा सरडा आढळल्याने पुन्हा एकदा चिपळूण तालुक्यातील जंगल संपत्तीची चर्चा सुरू झाली आहे.
गोंधळे गावातील जंगल हे विस्तीर्ण आणि घनदाट आहे. काही तरुण येथे फेरफटका मारत असताना त्यांना एक आगळावेगळा सरडा निदर्शनास आला. हिरवा पोपटी रंग आणि त्याच्यावर सफेद ठिपके असा सुंदर सरडा बघितल्यानंतर हा सरडा दुर्मीळ जातीचा असल्याचे त्यांच्या लक्षात आले. त्यांनी तत्काळ वर्ल्ड फॉर नेचर या संस्थेशी संपर्क साधला. या संस्थेचे अमित जाधव, स्वप्नील जाधव, अविनाश जाधव आणि कार्याध्यक्ष प्रथमेश पवार यांनी थेट गोंधळे येथील जंगलात येत य सरड्याची पाहणी केली. हा शॅमेलियन जातीचा अत्यंत दुर्मीळ असा सरडा असल्याचे त्यांच्या अभ्यासातून पुढे आले. वातावरणाप्रमाणे आणि निसर्ग ऋतूप्रमाणे रंग बदलणारा गिरगिट म्हणून त्याची ओळख आहे.
170721\img-20210717-wa0017.jpg
चिपळूणमधील गोंधळे जंगलात आढळला दुर्मिळ शॅमलियन सरडा