रत्नागिरी : शहरातील आठवडा बाजार येथे मटका जुगार खेळत असताना शहर पोलिसांनी सोमवारी सायंकाळी धाड टाकून रोख रक्कम व जुगाराचे साहित्य जप्त केले आहे. याप्रकरणी पाेलिसांनी एकाविरुध्द गुन्हा दाखल केला आहे.
रत्नागिरी शहर पोलीसचे नाईक राहुल घोरपडे यांना आठवडा बाजार येथे कल्याण मटका जुगाराचा खेळ सुरू असल्याची माहिती मिळाली. त्यांनी मिळालेल्या माहितीच्या आधारे सायंकाळी ७.३० वाजण्याच्या सुमारास तिथे छापा टाकला. त्यावेळी विजय गणपत आयनारकर (वय ४९, रा. मुरुगवाडा, जकातनाका, रत्नागिरी) हा लोकांकडून पैसे घेऊन जुगार खेळत असल्याचे दिसले. यावेळी रोख रक्कम ८६७ आणि जुगाराचे साहित्य जप्त करण्यात आले. विजय आयनारकर यांच्या विरुध्द महाराष्ट्र जुगार कायदा कलम १२ (अ) प्रमाणे गुन्हा दाखल करण्यात आला आहे.