खेड : येथील नगर परिषदेचे स्वच्छता विभागातील कर्मचारी कृष्णा गंगाराम निकम निवृत्त झाले. त्यांना नगर परिषदेचे कर्मचारी संघटना तसेच नगर परिषदेतर्फे निरोप देण्यात आला. यावेळी प्रमुख पाहुणे म्हणून माजी आमदार संजय कदम, नगराध्यक्ष वैभव खेडेकर, उपनगराध्यक्ष सुनील दरेकर उपस्थित होते.
निर्जंतुकीकरण
चिपळूण : तालुक्यातील मिरजोळी ग्रामपंचायतीतर्फे ग्रामस्थांच्या पाठपुराव्यानंतर गावामध्ये निर्जंतुकीकरण करण्यात आले. याशिवाय जनजागृती करून ग्रामस्थांना आरोग्याबाबत काळजी घेण्याचे आवाहन करण्यात आले. गावामध्ये कोरोनाचे रुग्ण सापडत असल्याने ग्रामपंचायतीतर्फे उपाययोजना करण्यात येत आहेत.
रुग्णालयासाठी मदत
चिपळूण : येथील ज्ञानप्रबोधिनीतर्फे उत्तम गुणवत्तेचा एक व्हेंटिलेटर व दोन ऑक्सिजन सयंत्रे डेरवण येथील भक्तश्रेष्ठ कमलाकरपंत वालावलकर रुग्णालयात भेट देण्यात आली. या उपकरणासाठी तीन लाख ७० हजार रुपये खर्च करण्यात आले. त्यासाठी ज्ञानप्रबोधिनी फाउंडेशनतर्फे भरीव मदत केल्याबद्दल रुग्णालय प्रमुख डॉ. सुवर्णा पाटील यांनी आभार व्यक्त केले.
वृक्षारोपण
खेड : शहरातील समर्थनगर येथील सभापती निवासाच्या परिसरात आमदार योगेश कदम यांच्याहस्ते वृक्षारोपण करण्यात आले. यावेळी सभापती मानसी जगदाळे व सभापती जीवन आंब्रे, शशिकांत चव्हाण, अरुण कदम, अजिंक्य मोरे, करण चव्हाण, प्रकाश मोहिते, महेंद्र भोसले आदी उपस्थित होते.
कामाला वेग
चिपळूण : गृहअलगीकरण बंद केल्यानंतर प्रशासनाने आता गाव स्तरावर विलगीकरण कक्ष सुरु करण्याच्या सूचना ग्रामपंचायतींना दिल्या आहेत. दोन हजारांपेक्षा जास्त लोकसंख्या असलेल्या गावामध्ये विलगीकरण कक्ष सुरू केले जाणार आहे. त्यानुसार तालुक्यातील ३२ गावांमध्ये विलगीकरण केंद्र सुरू करण्याच्या हालचाली सुरू झाल्या आहेत.
खुर्च्यांचे वाटप
दापोली : के. के. व्हिएन्स वसुंधरा फाऊंडेशन या संस्थेतर्फे नवभारत छात्रालयास खुर्च्यांचे वाटप करण्यात आले आहे. कोकण कृषी विद्यापीठाच्या माजी विद्यार्थ्यांनी कृषी कार्याचा वसा घेऊन फाउंडेशन स्थापन केले आहे. छात्रालयात गरीब व गरजू विद्यार्थी शिक्षणासाठी येतात. त्यांना हातभार लावावा यासाठी हा प्रयत्न करण्यात आला आहे.
सिद्धी शिंदे यांची निवड
खेड : खेड तालुका युवती सेना अध्यक्षपदी सिद्धी अजित शिंदे यांची निवड करण्यात आली आहे. राज्य कार्यकारिणी सदस्य योगेश कदम यांनी नियुक्तिपत्र दिले आहे. यावेळी पूनम जाधव, संजना कुडाळकर, राकेश सागवेकर, करण चव्हाण, सिद्धेश खेडेकर, विजय जाधव आदी उपस्थित होते.
व्हेंटिलेटरचे वितरण
रत्नागिरी : हिंदुस्थान युनिलिव्हर लिमिटेड या कंपनीतर्फे मिशन होप मोहिमेंतर्गत जिल्ह्यातील कोरोना रुग्णांसाठी सहा व्हेंटिलेटरची मदत करण्यात आली आहे. जिल्हाधिकाऱ्यांकडे हे व्हेंटिलेटर सुपूर्द करण्यात आले. यावेळी जिल्हा शल्यचिकित्सक डॉ. संघमित्रा फुले, हिंदुस्थान युनिलिव्हरचे अमोल आमटे उपस्थित होते.
परीक्षा शुल्क रद्द करावे
रत्नागिरी : कोरोनामुळे ऑनलाइन परीक्षा सर्व विद्यापीठांमार्फत सुरू आहेत. असे असतानादेखील विद्यापीठे विद्यार्थ्यांकडून परीक्षा शुल्क आकारत आहेत. यामुळे विद्यार्थ्यांचे व पालकांचे आर्थिक व मानसिक खच्चीकरण सुरू आहे. त्यामुळे परीक्षा शुल्क रद्द करण्याची मागणी विद्यार्थी-पालकांमधून होत आहे.
ऑनलाइन नोंदणी बंद
रत्नागिरी : पी. एम. किसान सन्माननिधीसाठी नवीन ऑनलाइन रजिस्ट्रेशन गेले अनेक महिने बंद असल्याने जिल्ह्यातील शेतकऱ्यांना आर्थिक नुकसानाला सामोरे जावे लागत आहे. त्यामुळे ऑनलाइन रजिस्ट्रेशन सुरू करावे, अशी मागणी शेतकऱ्यांमधून होत आहे.