खेड : केंद्र सरकारच्या भरमसाठ डिझेल व पेट्रोल दरवाढीविरोधात दापोलीचे माजी आमदार संजय कदम व राष्ट्रवादी काँग्रेसचे जिल्हाध्यक्ष बाबाजी जाधव यांनी मंगळवारी खेडचे प्रांताधिकारी अविशकुमार सोनोने व तहसीलदार प्राजक्ता घोरपडे यांना निवेदन दिले.
कोरोना काळात राज्यात महागाई वाढत आहे. लोकांकडे काम नाही. त्यातही पेट्रोल, डिझेल, गॅस, शेती उपयोगी रासायनिक खते यांच्या वाढत्या किमतींमुळे सामान्य जनतेचे जगणे कठीण झाले आहे. कोरोनामुळे अर्थिक स्थिती बिघडलेली असताना महागाई डोके वर काढत आहे. त्यामुळे जनतेचे आर्थिक गणित विस्कळीत झाले आहे. आताच्या परिस्थितीमध्ये शेतकऱ्यांना केंद्र सरकारने मदत करण्याऐवजी रासायनिक खताचे दर वाढवून शेतकऱ्यांना उद्‌ध्वस्त करण्याचे काम केले आहे. या प्रवृत्तीचा राष्ट्रवादी काँग्रेस जाहीर निषेध करत असल्याचे या निवेदनात नमूद करण्यात आले आहे.
रासायनिक खतांच्या वाढविलेल्या किंमती, पेट्रोल व डिझेलचे दर तत्काळ कमी करावेत, अशी मागणी या निवेदनातून करण्यात आली आहे. हे निवेदन देण्यासाठी राष्ट्रवादीचे तालुकाध्यक्ष स. तु. कदम, पंचायत समिती माजी सदस्य प्रकाश मोरे, युवक तालुकाध्यक्ष ॲड. अश्विन भोसले, शहराध्यक्ष व माजी नगरसेवक सतीश चिकणे, युवती शहराध्यक्षा ॲड. पूजा तलाठी, सुकिवलीचे माजी सरपंच विनायक निकम, सचिन सावंत, अरुण काकाडे, विक्रांत कदम तसेच सर्व पदाधिकारी कार्यकर्ते ग्रामस्थ उपस्थित होते.