रत्नागिरी : अल्पसंख्याक महिलांमधील उद्योजकतेला चालना देण्यासाठी मौलाना आझाद अल्पसंख्याक आर्थिक विकास महामंडळातर्फे अल्पसंख्याक समाजातील महिला बचतगटांना व्यवसायासाठी दोन लाख रुपयांपर्यंत कर्ज देण्यात येणार आहे. या योजनेद्वारे त्यांच्यासाठी स्वयंरोजगाराची संधी उपलब्ध करून देण्यात येणार आहे.
अल्पसंख्याक मुस्लिम, ख्रिश्चन, बौद्ध, शीख, जैन, पारशी आणि ज्यू समाजांतील महिलांचा समावेश असलेल्या बचतगटांना या सूक्ष्म पतपुरवठा योजनेचा लाभ देण्यात येणार आहे. महिला आर्थिक विकास महामंडळ (माविम), राष्ट्रीय शहरी जीवनोन्नती अभियान तसेच महाराष्ट्र राज्य ग्रामीण जीवनोन्नती अभियान (उमेद अभियान) या संस्थांच्या मदतीने ही योजना सर्व जिल्ह्यांमध्ये राबविण्यात येणार आहे. यापूर्वी लाभ मिळालेल्या पहिल्या व दुसऱ्या टप्प्यांच्या कर्जाची परतफेड ज्या अल्पसंख्याक महिला बचतगटांनी केलेली असेल, तो बचतगट तिसऱ्या टप्प्याच्या दोन लाख रुपये कर्जयोजनेसाठी पात्र राहणार आहे.
कर्जामध्ये महामंडळाचा हिस्सा एक लाख ९० हजार रूपये तर संबंधित महिला बचतगटाचा हिस्सा १० हजार रुपये असा असेल. व्याज दर सात टक्के इतका आहे. माविमसह इतर संस्थांतर्फे स्थापन करण्यात आलेल्या अल्पसंख्याक महिलांचा बचतगट या योजनेसाठी पात्र असणार आहे. महिला बचत गटातील ७० टक्क्यांपेक्षा अधिक सभासद अल्पसंख्याक समाजातील असणे आवश्यक आहे.
योजनेच्या अधिक माहितीसाठी मौलाना आझाद अल्पसंख्याक आर्थिक विकास महामंडळ, माविम, राष्ट्रीय शहरी जीवनोन्नती अभियान, महाराष्ट्र राज्य ग्रामीण जीवनोन्नती अभियान या संस्थांचे मुख्यालय किंवा जिल्हा, तालुका कार्यालयाशी संपर्क साधावा, असे आवाहन करण्यात आले आहे. या योजनेचे अर्ज मौलाना आझाद अल्पसंख्याक आर्थिक विकास महामंडळाच्या जिल्हा कार्यालयात उपलब्ध आहेत. महामंडळाच्या https://mamfdc.maharashtra.gov.in या संकेतस्थळावर अधिक माहिती उपलब्ध असून योजनेअंतर्गत अर्ज करण्याची अंतिम तारीख दि. २० जुलै आहे.