लाेकमत न्यूज नेटवर्क
खेड : खेड राष्ट्रवादी काँग्रेसचे शहराध्यक्ष आणि माजी नगरसेवक सतीश उर्फ पप्पू चिकणे यांनी आपल्या समर्थकांसह शिवसेना नेते आणि राज्याचे माजी पर्यावरण मंत्री रामदास कदम यांच्या उपस्थितीत हातात शिवबंधन बांधल्याने नगरपालिकेची निवडणूक तोंडावर आली असतानाच राष्ट्रवादीला मोठा धक्का बसला आहे.
राष्ट्रवादीचे जिल्हा आणि तालुका स्तरावरील नेते राजकीय निर्णय प्रक्रियेत जाणूनबुजून गळचेपी करत असल्याने आपण राष्ट्रवादी काँग्रेस सोडून हातात शिवबंधन बांधण्याचा निर्णय घेतला असल्याचे चिकणे यांनी प्रवेशानंतर माध्यमांशी बोलताना सांगितले. पक्षात माझ्या होत असलेल्या गळचेपीबाबत आपण वरिष्ठांच्या कानावर घातले होते. मात्र, वरिष्ठांनीही दखल न घेतल्याने आपण आपल्या सदस्यत्वाचा आणि शहराध्यक्षपदाचा राजीनामा दिला आहे.
राज्याचे माजी पर्यावरण मंत्री आणि शिवसेना नेते रामदास कदम यांच्या प्रमुख उपस्थितीत येथील सभापती निवास येथे चिकणे यांनी शिवसेनेत जाहीर प्रवेश केला. सतीश चिकणे यांच्या समर्थकांनीही यावेळी हाती शिवबंधन बांधले. शिवसेना नेते रामदास कदम आणि दापोली मतदार संघाचे आमदार योगेश कदम यांनी सतीश चिकणे यांचे शिवसेनेत स्वागत केले.