रत्नागिरी : जिल्हा रुग्णालयाच्या रक्तपेढीत सध्या विविध रक्तगटाचा तुटवडा जाणवत आहे. या शासकीय रक्तपेढीवर असंख्य रुग्ण अवलंबून असल्याने रक्ताची टंचाइ जाणवू लागताच हेल्पिंग हॅंडस फोरममधील सर्व संस्था पुन्हा एकवटल्या आहेत. या संस्थांच्या माध्यमातून बुधवार, ८ सप्टेंबर रोजी शहरातील जयस्तंभ भागातील गीताभवन येथे सकाळी १० ते दुपारी २ या वेळेत रक्तदान शिबिर आयोजित केले आहे.
येथील जिल्हा शासकीय रुग्णालयाच्या रक्तपेढीत सध्या रक्ताचा तुटवडा निर्माण झाला आहे. त्यामुळे या रक्तपेढीला गरोदर माता, बालके, डायलिसीस शस्त्रक्रिया, अपघाती रुग्ण यांना रक्तपुरवठा करण्यास अडचणी येत आहेत. सध्या कोरोनाबाधितांची वाढती संख्या आणि प्रतिबंधक लसीकरणाचा वेग वाढला आहे. त्यामुळे दात्यांची संख्या घटली आहे.
जिल्हा शासकीय रुग्णालयातील शस्त्रक्रिया, प्रसूती, थॅलेसिमिया, हिमोफिलीया रुग्ण, आर्थिक दुर्बल घटक, ज्येष्ठ नागरिक रुग्ण आदींसाठी मोफत रक्तपुरवठा केला जातो.
सध्या या रुग्णालयात विविध साथींच्या आजारांची रुग्णसंख्या वाढू लागली आहे. तसेच प्रसूती, डायलिसीस रुग्ण तसेच सध्या डेंग्यूचे रुग्ण वाढल्याने त्यांनाही प्लेटलेट्सची गरज मोठ्या प्रमाणावर भासत आहे. कोरोनाबाधितांची संख्या वाढल्याने दात्यांची संख्या कमी झाली आहे. सध्या वाढलेल्या लसीकरणाचा परिणामही रक्त संकलनावर होत आहे. त्यामुळे रक्तपेढीत रक्त संकलन घटले आहे. रक्तपेढीतील रक्ताची गरज लक्षात घेऊन पुन्हा हेल्पिंग हॅंडस मदतीसाठी पुढे आले आहेत.
रत्नागिरी जिल्ह्याचे तत्कालीन जिल्हाधिकारी सुनील चव्हाण यांच्या विचारातून हा फोरम निर्माण झाला. २०१९ मध्ये कोल्हापूर सांगली या भागांमध्ये मोठ्या प्रमाणात पूर आला होता. त्यावेळी रत्नागिरीतून मदतीचे अनेक हात पुढे आले होते. यातूनच हेल्पिंग हेल्पिंग हँडस ही संकल्पना पुढे आली. जवळजवळ २८ संघटना एकत्रित येऊन हेल्पिंग हँड्स कार्य सुरू झाले. २०१९ च्या पूरग्रस्तांच्या मदतीपासून सातत्याने समाजाभिमुख मदती करता हेल्पिंग हँड्स काम करू लागली. त्यानंतर जवळपास गेली दोन वर्ष कोरोना महामारीच्या पार्श्वभूमीवर हेल्पिंग हँड्सच्या माध्यमातून कोरोना रुग्णांना मदत करणे, लसीकरण केंद्रावर मदत करणे, लॉकडाऊन काळामध्ये जीवनावश्यक वस्तूंचा पुरवठा, गेल्यावर्षी दापोलीत झालेल्या तौक्ते वादळावेळी या ठिकाणी जाऊन त्यासाठी त्या ठिकाणच्या लोकांना मदत करणे, आत्ताच चिपळूण या ठिकाणी आलेल्या महापुरामध्ये नागरिकांना/ पूरग्रस्तांना मदत आणि बचाव कार्य करण्याचे काम असे अनेक उपक्रम अव्याहतपणे सुरू आहेत. अर्थात यासाठी प्रशासनाचे सहकार्य वेळोवेळी लाभलेले आहे.
सध्या शासकीय रक्तपेढीसाठी रक्तसंकलनाची गरज लक्षात घेउन ‘हेल्पिंग हँड्स’ द्वारे बुधवारी रक्तदान शिबिर आयोजित केले आहे.
इच्छुक रक्तदात्यांनी यात आपला सहभाग नोंदवावा, असे आवाहन हेल्पिंग हँड्स कडून करण्यात येत आहे. नोंदणीसाठी श्रीवल्लभ वणजू, कुणाल शेरे, श्यामल शेठ यांच्याकडे संपर्क करावा.