रत्नागिरी : जिल्हा आरोग्य अधिकारी डॉ. बबिता कमलापूरकर यांची पुणे येथे बदली झाली आहे. त्यांच्या जागी जिल्हा परिषदेचे तत्कालीन जिल्हा आरोग्य अधिकारी डॉ. अनिरुद्ध आठल्ये यांची सातारा येथून रत्नागिरीत बदली झाली आहे.
जिल्हा आरोग्य अधिकारी डॉ. कमलापूरकर यांची बदली व्हावी, यासाठी जिल्हाधिकारी लक्ष्मीनारायण मिश्रा आणि मुख्य कार्यकारी अधिकारी डॉ. इंदुराणी जाखड यांनी शासनाकडे मे महिन्यामध्ये प्रस्ताव पाठविला होता. डॉ. कमलापूरकर या रत्नागिरी जिल्हा परिषदेत दोन वर्षांपूर्वी जिल्हा आरोग्य अधिकारी या पदावर रुजू झाल्या होत्या. डॉ. कमलापूरकर यांच्या कामाबाबत अनेक तक्रारी होत्या. शासनाने जिल्हाधिकाऱ्यांनी पाठविलेल्या प्रस्तावाची दखल घेतली असून, डॉ. कमलापूरकर यांची बदली पुणे येथे करण्यात आली आहे.
दरम्यान, डॉ. कमलापूरकर यांच्या आधी डॉ. अनिरुद्ध आठल्ये यांनी जिल्हा आरोग्य अधिकारी पदावर उत्कृष्ट कामगिरी बजावली होती. त्यांनी जिल्हा परिषदेच्या सेस फंडातून १६ हजार रुपये मानधनावर प्राथमिक आरोग्य केंद्रांमध्ये डॉक्टरांची नियुक्ती केली होती. त्यानंतर अनेक जिल्ह्यांनी डाॅ. आठल्ये यांच्याप्रमाणे प्राथमिक आरोग्य केंद्रांमध्ये डॉक्टरांची नियुक्ती केली होती. डॉ. आठल्ये येत्या दोन दिवसांत रत्नागिरी जिल्हा परिषदेत जिल्हा आरोग्य अधिकारी पदावर रुजू होणार आहेत.