रत्नागिरी : दिव्यांग व्यक्तींना कोरोना तपासणी, लसीकरण तसेच आवश्यक असल्यास उपचारासाठी रांगेत उभे रहावे लागू नये; तसेच कोरोनाचा संभाव्य धोका कमी व्हावा, यासाठी या सर्व ठिकाणी त्यांना प्राधान्य दिले जावे, असा निर्णय घेण्यात आला आहे. तसेच राज्य शासनाच्या सेवेतील दिव्यांग अधिकारी-कर्मचाऱ्यांना कार्यालयात उपस्थित राहण्यापासून सवलत देण्याचा तसेच ‘वर्क फ्रॉम होम’ची सवलत देण्याचा निर्णय घेण्यात आला आहे.
दिव्यांग व्यक्तींना असलेला संसर्गाचा धोका, प्रवासाची व रांगेत तिष्ठत उभे राहण्याची अडचण लक्षात घेता राज्यातील सर्व दिव्यांग व्यक्तींना कोरोना तपासणी, कोरोनाबाधित असल्यास त्यावरील उपचार तसेच लसीकरण या ठिकाणी प्राधान्य देण्यात यावे, त्यांना रांगेत उभे करू नये, अशा स्पष्ट सूचना देण्यात आल्या आहेत. या निर्णयाची काटेकोर अंमलबजावणी करावी, असे सामाजिक न्याय व विशेष सहाय्य विभागाने पत्राद्वारे आरोग्य विभाग, नगरविकास विभाग, ग्रामविकास विभाग तसेच वैद्यकीय शिक्षण व औषधी द्रव्ये विभागाला कळविले आहे.
राज्यात कोरोनाच्या अनुषंगाने लागू करण्यात आलेल्या निर्बंधाच्या कालावधीत विविध कार्यालयांमध्ये १५ टक्के कर्मचाऱ्यांच्या उपस्थितीत काम करण्याची सवलत देण्यात आली आहे. तथापि, जारी करण्यात आलेल्या परिपत्रकान्वये राज्य शासन सेवेतील दिव्यांग अधिकारी-कर्मचाऱ्यांना कार्यालयीन उपस्थितीतून सवलत देत घरातून कामकाजाची (वर्क फ्रॉम होम) सवलत देण्याचा निर्णय घेण्यात आला आहे. याद्वारे संबंधित कर्मचाऱ्यांना ‘वर्क फ्रॉम होम’ची सुविधा संबंधित विभाग/आस्थापनांनी उपलब्ध करून द्याव्यात, अशा सूचना करण्यात आल्या आहेत. असे करताना कार्यालयीन कामकाजावर परिणाम होणार नाही, याकडेही लक्ष देण्याची सूचना केली आहे.
कोरोनामुळे निर्माण झालेली परिस्थिती आटोक्यात येऊन नवीन आदेश जाहीर करेपर्यंत दिव्यांग अधिकारी व कर्मचारी यांना उपस्थितीत सवलत देण्यासह दिव्यांग व्यक्तींना कोरोना तपासणी, उपचार व लसीकरणासाठी प्राधान्य देणे आदी निर्णय घेण्यात आले आहेत.