फोटो ओळ :
रत्नागिरी शहरातील धनजीनाका येथे रस्ता बॅरिकेट्‌स लावून वाहतुकीसाठी बंद करण्यात आला आहे. (छाया : तन्मय दाते)
लाेकमत न्यूज नेटवर्क
रत्नागिरी : शहरातील धनजीनाका येथील वाहतूक कोंडी व होणारी गर्दी लक्षात घेता, शहर पोलीस व नगरपालिका प्रशासनाने संयुक्तपणे तोडगा काढत हा रस्ता बंद केला आहे. या रस्त्यावर बॅरिकेट्‌स उभे करून रस्ता रहदारीसाठी बंद करण्यात आला आहे.
जुनी बाजारपेठ असलेला धनजीनाका हा परिसर नेहमीच वर्दळीचा व वाहतूक कोंडीचा असतो. या भागातले रस्ते छोटे असल्याने वाहतूक काेंडी ही नेहमीचीच समस्या बनली आहे. या भागातील दुकानदारांचे रस्त्यावर आलेले सामान व रस्त्यावर बसणारे विक्रेते यामुळे हा रस्ता रहदारीसाठी जेमतेमच शिल्लक राहत आहे. या भागात हाेणारी वाहतूक काेंडी आणि गर्दी टाळण्यासाठी उपविभागीय पोलीस अधिकारी सदाशिव वाघमारे यांनी जिल्हा पोलीस अधीक्षक डॉ. मोहितकुमार गर्ग यांच्या मार्गदर्शनाखाली यावर तोडगा काढला. गाड्या आत जाऊ नयेत म्हणून बॅरिकेट्‌स लावण्यात आले. यासाठी पोलिसांनी नगरपालिकेची मदत घेतली आहे.
पोलिसांच्या या संयुक्त कारवाईमुळे येथील गर्दी व वाहतूक कोंडी यावर काहीअंशी तोडगा काढण्यात यश आले आहे. यावेळी प्रभारी शहर पोलीस निरीक्षक विनित चौधरी, सहायक पोलीस निरीक्षक मनाेज भोसले, विजय जाधव व पोलीस कर्मचारी आणि नगरपरिषदेचे अधिकारी व कर्मचारी उपस्थित होते.