मोबाईल सेवा कोलमडली
राजापूर : तालुक्यातील पूर्व परिसरातील मोबाईल इंटरनेट सेवा कोलमडली आहे. भारत संचार निगमसह अन्य खासगी कंपन्यांची सेवा वारंवार ठप्प होत असल्याने बॅंका तसेच शासकीय कार्यालयातील कामकाजावर परिणाम होत आहे. यामुळे ग्राहकांना लाॅकडाऊन असतानाही कामासाठी सातत्याने फेऱ्या माराव्या लागत आहेत.
पाणीपुरवठा सुरू
देवरूख : शहरामध्ये न्यू इंग्लिश स्कूल व गुरूवर्य काकासाहेब सप्रे कनिष्ठ महाविद्यालय, श्रीमती अरूंधती अरूण पाध्ये इंग्लिश मीडियम स्कूल, डाॅ. बाबासाहेब आंबेडकर वसतिगृह येथे कोविड केअर सेंटर उभारण्यात आले आहे. या सेंटरमध्ये पाण्याची उपलब्धता करून देण्यासाठी देवरूख नगर पंचायतीचे मुख्याधिकारी बालाजी लोंढे यांची नियुक्ती नोडल अधिकारी म्हणून करण्यात आली आहे.
जन्मोत्सव कार्यक्रम रद्द
चिपळूण : तालुक्यातील शिरळ -मालघर येथील श्री लक्ष्मीकेशव देवस्थानतर्फे श्रीराम जयंतीनिमित्त जन्मोत्सव साेहळा उत्साहाने साजरा करण्यात येतो. मात्र, यावर्षी कोरोनामुळे शासकीय नियमावलीचे पालन करून जन्मोत्सव कार्यक्रमच रद्द करण्यात आला. कार्यक्रम, उत्सव, महाप्रसाद रद्द करण्यात आले होते.
ऑनलाईन कलादिन
रत्नागिरी : येथील गोगटेे - जोगळेकर महाविद्यालयातील १९९५ मधील माजी विद्यार्थी सतत विविध उपक्रमांचे आयोजन करीत आहेत. व्हाॅट्सॲप ग्रुपच्या माध्यमातून आपापली कला सादर करून सकारात्मक वातावरण निर्माण केले. अनेक माजी विद्यार्थ्यांनी आपापल्या कलेचे व्हिडिओ सादर केले.