देवरुख : आंबव येथील राजेंद्र माने अभियांत्रिकी महाविद्यालयाच्या प्राध्यापक व विद्यार्थ्यांनी विलगीकरण केंद्रासाठी आरएफद्वारा नियंत्रित कार्टची निर्मिती केली. विलगीकरण केंद्रामध्ये काम करणाऱ्या आरोग्य कर्मचाऱ्यांना रुग्णाची देखरेख करताना स्वत:च्या आरोग्याची काळजी घेणे तितकेच गरजेचे असते. मात्र, रुग्णाशी येणारा थेट संपर्क त्यांच्या आरोग्यावर परिणाम करणारा असतो. याच अनुषंगाने महाविद्यालयामध्ये अभियांत्रिकी ज्ञान व उत्पादन सुविधा वापरून कार्ट बनविण्यात आल्या.
जिल्हाधिकारी लक्ष्मीनारायण मिश्रा व संगमेश्वरचे तहसीलदार सुहास थोरात यांच्याकडे हे कार्ट सुपूर्द करण्यात आल्या. त्यांचा रत्नागिरी, संगमेश्वर, चिपळूण (कामथे), खेड (कळंबणी), दापोली या ठिकाणच्या शासकीय रुग्णालये व विलगीकरण केंद्रात वापर करण्यात येत आहे. ही एक बॅटरीवर चालणारी कार्ट असून त्याद्वारे २०० मीटरपेक्षा अधिक अंतर आणि जवळपास ८० किलोपर्यंतच्या वजनाच्या सामग्रीची ने-आण करणे शक्य होते आहे.
शैक्षणिक वर्ष २०२०-२१ साठी संस्थेने कोविड-१९ योद्धा सन्मान शिक्षण योजना आंबव येथील अभियांत्रिकी पदवी महाविद्यालय, एमबीए व पॉलिटेक्निकमध्ये लागू केली आहे. कोरोना संकटाचा मुकाबला करण्यासाठी अहोरात्र लढणाऱ्या कोविड योद्धयांचा यथोचित सन्मान करण्याचा प्रयत्न केला. रत्नागिरी, सिंधुदुर्ग, रायगड, पालघर, ठाणे, नवी मुंबई, मुंबई व मुंबई उपनगर जिल्ह्यातील रुग्णालय, पोलीस दल, नगरपालिका / महानगरपालिकेमध्ये कार्यरत कर्मचाऱ्यांच्या पाल्यांसाठीही मोफत शिक्षण शुल्क व मोफत वसतिगृह शुल्क योजना राबविण्यात आली. ही योजना शैक्षणिक वर्ष २०२१-२२ साठी सुद्धा सुरू ठेवत असल्याचे संस्थाध्यक्ष रवींद्र माने यांनी जाहीर केले आहे.