लाेकमत न्यूज नेटवर्क
चिपळूण : शहरातील दोन ठिकाणी झालेल्या घरफोड्यांच्या घटना ताज्या असतानाच पुन्हा खेर्डी मोहल्ला येथे बंद घर फोडून चोरट्याने तब्बल १ लाख २० हजार रुपये किमतीचे मंगळसूत्र चोरून नेले आहे. याप्रकरणी पोलिसांनी चोरट्यावर गुन्हा दाखल केला आहे.
रेश्मा भालेकर (३९, कोकण हेरिटेज, खेर्डी-मोहल्ला) यांनी फिर्याद दिली आहे. त्यांनी दिलेल्या फिर्यादीनुसार भालेकर यांचे राहते घर बंद आहे. त्याचा फायदा घेत चोरट्यांनी ४ ते ५ सप्टेंबर या कालावधीत घराच्या दर्शनी दरवाजाची कडी लावलेले बंद कुलूप तोडून घरात प्रवेश केला. बेडरूममधील लोखंडी कपाटातील लॉकरमध्ये ठेवलेले १ लाख २० हजार रुपये किमतीचे चार तोळे वजनाचे सोन्याचे मंगळसूत्र चोरट्याने चोरून नेले. हा प्रकार भालेकर यांना समजल्यानंतर त्यांनी याबाबतची तक्रार पोलीस स्थानकात दिली. पाेलिसांनी घटनास्थळी भेट देऊन पाहणी केली.