रत्नागिरी : समोरून येणाऱ्या दुचाकीला धडक देत मुलगा व आई जखमी झाल्याची घटना शुक्रवार, २४ सप्टेंबर रोजी दुपारी तीन वाजता पावस तेलीवाडी येथे घडली. याप्रकरणी पूर्णगड पाेलीस स्थानकात कारचालक संकेत दत्तात्रय इंगळे (रा. तुपेवाडी - कडेगाव, सांगली) याच्यावर गुन्हा दाखल करण्यात आला आहे.
या अपघातात रोशन रवींद्र चांदळे (वय २७) आणि आई रजनी रवींद्र चांदळे (४५, दाेघे रा. गणेशगुळे, रत्नागिरी) हे जखमी झाले आहेत. संकेत इंगळे हा कार (एमएच १३, एझेड-११७१) भरधाव वेगाने घेऊन गणेशगुळे ते रत्नागिरी असा येत होता. त्याचदरम्यान रोशन चांदळे दुचाकी (एमएच ०८, एएच ६०१८) वरून आपल्या आईला सोबत घेऊन पावस ते गणेशगुळे असा येत होता. ही दोन्ही वाहने पावस - तेलीवाडी येथे आली असता संकेतचा आपल्या कारवरील ताबा सुटला आणि त्याने रोशनच्या दुचाकीला धडक दिली. यामध्ये रोशन आणि त्याची आई रजनी चांदळे दाेघे जखमी झाले. या अपघातप्रकरणी अधिक तपास पूर्णगड पोलीस करीत आहेत.