रत्नागिरी : जिल्ह्यात ५,४२३ लोकांना भीषण पाणीटंचाईची झळ बसली असून त्यांची पाण्यासाठी वणवण सुरू आहे. या २७ गावांतील ३८ वाड्यांमधील टँकर्सग्रस्तांना १० टँकर्सनी पाणी पुरवठा करण्यात येत असून तोही अपुरा पडत असल्याने लोक हैराण आहेत. त्यातच कोरोनामुळे जिल्ह्यात लॉकडाऊन असल्याने या टंचाईग्रस्तांसाठी पाण्यासाठी हाल होत आहेत.
जिल्ह्यात दरवर्षी पाणीटंचाई उद्भवते. या टंचाईग्रस्तांमध्ये धनगरवाड्यांचा मोठा समावेश आहे. डोंगर-दऱ्यात वसलेल्या धनगरवाड्यांतील लोकांना पाण्यासाठी वणवण भटकंती करावी लागत आहे. त्यांना जनावरांना देण्यासाठी पाणी नसल्याने ती तडफडू लागली आहेत. कडक उन्हामुळे पाण्याची पातळी खालावल्याने विहिरी, ओढे, नाले, विंधन विहिरी आटल्याने ही परिस्थिती ओढवली आहे.
दिवसेेंदिवस टंचाईग्रस्त गावे व वाड्यांमध्ये भर पडत आहे. भयंकर उकाडा होत असून पाण्याची पातळी खालावलेली आहे. या टंचाईग्रस्तांना पाणी पुरवठा करताना शासनाची दमछाक होत आहे. लोकांची पाण्यासाठी वणवण भटकंती सुरू आहे.
टंचाईग्रस्त गावांना शासकीय ३ आणि खासगी ७ अशा केवळ १० टँकर्सनी पाणी पुरवठा करण्यात येत आहे. मात्र, तोही अपुरा पडत असल्याने या टंचाईग्रस्तांना पाण्यासाठी वणवण भटकंती करावी लागत आहे. तसेच जनावरांचीही पाण्यासाठी तडफड होत आहे. कोरोना विषाणूचा प्रादुर्भाव रोखण्यासाठी प्रशासन गुंतले आहे. कोरोनामुळे जिल्ह्यात लॉकडाऊन असल्याने त्याचा परिणाम टंचाईग्रस्तांना करण्यात येणाऱ्या पाणी पुरवठ्यावर होत आहे.
................................
टंचाईग्रस्त गावे, वाड्या व टँकर...
तालुका गावे वाड्या टँकर
मंडणगड ०१ ०१ ०१
रत्नागिरी ०२ ०६ ०१
खेड ०८ ०९ ०३
चिपळूण ०५ ०७ ०१
संगमेश्वर ०५ ०७ ०२
लांजा ०५ ०५ ०१
राजापूर ०१ ०१ ०१
एकूण-- २७ ३८ १०
.................................
वाड्या आणि लोकसंख्या
तालुका वाड्या लोकसंख्या
मंडणगड ०१ ६१०
रत्नागिरी ०६ १४१६
खेड ११ १३२०
चिपळूण ०७ ८२७
संगमेश्वर ०७ ९५९
लांजा ०५ ७१३
राजापूर ०१ २८
एकूण- ३८ ५४२३
.............................
पाणी पुरवठ्याची कामे निविदास्तरावर
जिल्ह्यात कोरोना संसर्गामुळे लॉकडाऊन आहे. त्यामुळे जिल्ह्यात पाणीटंचाई भासत असली तरी टंचाई कृती आराखड्यातील कामे सुरू झालेली नाहीत. अजूनही पाणी पुरवठ्याची कामे निविदास्तरावर आहेत. त्यामुळे गतवर्षीप्रमाणेच यंदाही जिल्ह्यावर कोरोनाचे सावट असतानाच पाणीटंचाईची भीषणताही वाढण्याची शक्यता निर्माण झाली आहे.