महाड : भरधाव वेगाने जाणाऱ्या दोन एसटी बसेसची समोरासमोर टक्कर होवून झालेल्या अपघातात दोन्ही बसेसमधील ३१ प्रवासी जखमी झाले आहे. मंगळवारी सकाळी साडेआठच्या सुमारास माणगाव ताम्हाणी मार्गावर कोस्ते आदिवासीवाडीजवळ हा अपघात घडला. अपघातातील सर्व जखमी प्रवासी हे महाड, माणगाव, श्रीवर्धन परिसरातील आहेत.सकाळी साडेसात वाजता महाड आगारातून सुटलेली विन्हेरे-स्वारगेट ही बस आणि दिवेआगर-स्वारगेट बस या दोन वाहनांचा अपघात झाल्यानंतर परिसरातील नागरिकांनी जखमी प्रवाशांना मदतकार्य केले. सर्व जखमींवर माणगाव कुटीर रुग्णालयात उपचार करण्यात येत असून जखमींमध्ये दोन्ही बसेसच्या चालकांचाही समावेश आहे. या अपघातात रोहिणी जाधव, राजेश इनामदार, जय चव्हाण, अनिल मिसाळ (चालक), नरगीस शिरगावकर, अतुल खेडेकर, प्रवीणचंद्र आदी जखमी झाले आहेत. माणगाव पोलीस ठाण्यात या अपघातप्रकरणाची नोंद करण्यात आली आहे. (वार्ताहर)
दोन बसची टक्कर; ३१ जखमी
By admin | Updated: July 22, 2015 03:25 IST