अलिबाग-वडखळ मार्गावर टेम्पो खाक

अलिबाग-वडखळ महामार्गावर तीनवीरा येथे टेम्पोच्या वायरिंगमध्ये आग लागल्यामुळे टेम्पो जळून खाक झाला. सुदैवाने जीवित हानी टळली.

कार्लेखिंड : अलिबाग-वडखळ महामार्गावर तीनवीरा येथे टेम्पोच्या वायरिंगमध्ये आग लागल्यामुळे टेम्पो जळून खाक झाला. सुदैवाने जीवित हानी टळली.अलिबाग-वडखळ मार्गावरून टेम्पो चालक तेजस पटेल टेम्पो क्र. एमएच ०६ इ ३५१६ मधून वेफर्सचा माल भरलेला टेम्पो अलिबागहून पेणकडे घेऊन जात असताना तीनवीरा येथे अचानक इंजिनमधून जळाल्याचा वास आला. त्यामुळे लगेचच वाहन थांबविले. परंतु दोन-तीन सेकंदातच वाहनाच्या इंजिनमधून आगीचा लोट बाहेर आला आणि बघताच आग भडकली. त्यामध्ये वेफर्सचे पाऊच असल्याने आग अधिक भडकली. या घटनेची माहिती मिळताच जिल्हा वाहतूक शाखेतील पोयनाड येथे नेमणुकीस असलेले पोलीस हवालदार किशोर जाधव व पाटील यांनी घटनास्थळी पोहोचून दोन्ही बाजूची वाहतूक थांबवली. अग्निशमन दलाला फोन केल्यानंतर दहा-पंधरा मिनिटांत आरसीएफ कंपनी व अलिबाग नगर परिषद व जेएसडब्लू कं पनीचे अग्निशमन वाहन पोहोचले व ही आग नियंत्रणात आणण्यात आली. अग्निशमन अधिकारी अनवान जॉन यांनी आग जर लवकर विझविण्यात आली नसती तर वाहनाचा स्फोट झाला असता असे सांगितले. चालकाच्या सतर्कतेमुळे जीवितहानी टळली; परंतु टेम्पो वाहन आणि त्यातील वेफर्सचा ६० हजारांचा माल जळाल्यामुळे मालकाचे नुकसान झाले आहे. (वार्ताहर)