संधिवात तज्ज्ञ डॉ प्रवीण पाटील यांनी रुग्णांच्या केलेल्या पाहणीतून बाब समोर
लोकमत न्यूज नेटवर्क
पुणे : शरीराची चुकीची ढब, अतिकष्टांमुळे येणारा थकवा किंवा चुकीच्या जीवनशैलीमुळे जडलेली पाठदुखी म्हणून बरेचदा दुर्लक्षित केले जाणारे दुखणे हे प्रत्यक्षात शरीराच्या रोगप्रतिकारशक्तीच्या अभावामुळे उद्भवणारी एक स्थिती म्हणजे अँकिलोजिंग स्पॉन्डिलायटिस (एएस) असू शकते, जी अवघ्या विशी आणि तिशीत गाठू शकते आणि कायमच्या अपंगत्वास कारणीभूत ठरू शकते असा इशारा प्रसिद्ध संधिवात तज्ज्ञ डॉ. प्रवीण पाटील यांनी दिला आहे.
अँकिलोजिंग स्पॉन्डिलायटिस (एएस) हा संधीवाचाच एक प्रकार आहे. जो रक्तातील संधीवाताच्या प्रकारात मोडतो.
जो १५ ते ४० वयोगटाच्या आतील तरुणांना होतो. डॉ पाटील यांनी पुण्यातील या वयोगटातील १०० रुग्णांची पाहाणी केली. त्यामध्ये एएसच्या जवळ-जवळ ७० टक्के रुग्णांमध्ये आजाराच्या सुरुवातीच्या ३ वर्षांमध्ये किंवा त्याहून अधिक काळ आजाराचे योग्य निदान होत नसल्याचे निदर्शनास आले आहे.
संधीवाततज्ज्ञ डॉ. प्रवीण पाटील म्हणाले, शंभरातील जवळ-जवळ एक व्यक्ती मणक्याच्या इन्फ्लेमेटरी आर्थ्ररायटीसने ग्रस्त आहे. या स्थितीमध्ये मणक्याची हाडे एकमेकांशी जोडली जातात व मणका ताठर होतो. यामुळे पाठीला कायमचा पोक येतो. साधारणपणे १४-४० वर्षे वयोगटामध्ये जडणारा व पुरुषांच्या उत्पादक वर्षांची मोठी हानी करणारा हा आजार घरगुती उपचार करून किंवा दुकानात मिळणारी औषधे घेऊन बरा करण्याचा प्रयत्न रुग्णांकडून बरेचदा केला जातो. या आजारात सायटिका वगैरेसारखे चुकीचे निदान देखील केली जाते. निदान आणि उपचारांना उशीर झाल्यामुळे उत्पादकता कमी होणे, कामावरील गैरहजेरी वाढत असल्याचे व त्यामुळे ८ टक्के तरुणांना नोकरीही गमवावी लागल्याचे दिसले.
......
अँकिलोजिंग स्पॉन्डिलायटिस (एएस) लक्षणे
* पाठीचे दुखणे
* आराम केल्यावर त्रास होणे. विशेषतः रात्री आणि सकाळी वेदना होणे
* एका जागी बसल्यावर त्रास होणे.