दीपक कुलकर्णी
पुणे : पुणे, मुंबईसह राज्यात कोरोना दिवसेंदिवस भयावह रूप धारण करतो आहे. त्याला रोखण्यासाठी सरकार आणि प्रशासन यंत्रणा आपापल्यापरीने सर्वतोपरी प्रयत्न करत आहे.यात लसीकरणाची मोहीमसुद्धा मोठ्या प्रमाणात सुरू आहे. याचवेळी हिंजवडी, माण परिसरात एक स्तुत्य उपक्रम राबविला जात आहे. रहिवाशांनी परिसरातील शासनाकडून दुर्लक्षित अशा ४५ वर्षांपुढील ‘फ्रंटलाईन वर्कर्स’च्या लसीकरणाची मोहीम हाती घेतली आहे.
पुणे, पिंपरी-चिंचवड परिसरात कोरोनाचा विळखा घट्ट होत आहे. आणि यावेळी मोठमोठ्या सोसायट्या, इमारती कोरोनाचा हॉटस्पॉट असल्याचे समोर येत आहे. परंतु, याही विदारक परिस्थितीत सोसायट्यांचे सुरक्षारक्षक, सफाई कामगार, कचरा गोळा करणारे, घरातील कामवाल्या महिला जीव धोक्यात घालून आपले कर्तव्य बजावत आहे. त्यांच्या आरोग्याची काळजी घेणे कर्तव्य समजून हिंजवडी, माण परिसरातील काही सोसायट्यांनी ४५ वर्ष पूर्ण केलेल्या फ्रंटलाईन वर्कर्सच्या लसीकरणाची मोहीम हाती घेतली आहे.
रहिवासी रवींद्र सिन्हा म्हणाले, मोठमोठ्या सोसायट्यांमध्ये सुरक्षारक्षक, सफाई कामगार, कचरावेचक यासारखी अनेक मंडळी कोरोनाकाळात देखील आपले काम करत आहे. त्यांच्यात ४५ वर्षांपुढील अनेक जण आहेत. त्यांना कोरोना लसीकरणासाठी ऑनलाईन नोंदणी करणे जमत नाही. आतापर्यंत जवळपास १००हून अधिक अशा वर्कर्सचे लसीकरण करण्यात आले आहे.
या उपक्रमाचा भाग असलेली मेगापोलिश सोसायटीचे अंशुल गुप्ता म्हणाले, मोठमोठ्या टाऊनशीपमध्ये साधारण २० ते ५० फ्रंटलाईन कर्मचारी काम करत असतात. त्यांच्या आरोग्याला धोक्यात घालून ते आपल्या कुटुंबाची काळजी घेत असतात.
....
‘फ्रंटलाईन वर्कर्स’च्या लसीकरणासाठी वयोमर्यादेची अट शिथिल करावी...
केंद्र व राज्य सरकारने आता सफाई कामगार, सुरक्षारक्षक, कचरा वेचणारे, कामवाल्या महिला यांना फ्रंटलाईन वर्कर्सच्या पंक्तीत आणून त्यांच्या लसीकरणाला परवानगी द्यावी. ही परवानगी मिळाली तर लसीकरण मोहीम अधिक व्यापक होईल. या माणसांची कुटुंब सुरक्षित होण्यास मोठा हातभार लागेल.
- रवींद्र सिन्हा, रहिवासी