राजगुरुनगर : हुतात्मा राजगुरू सोशल फाउंडेशनचे कार्य प्रेरणादायी आहे. जगाच्या पाठीवर अनेक लोक इतरांना मदत करतात, अडचणीत सापडलेल्या माणसाला मदत केली पाहिजे. मनुष्य सेवा हीच खरी ईश्वर सेवा हे ब्रीदवाक्य ठेवून फाउंडेशन उल्लेखनीय काम करीत आहे, असे प्रतिपादन आमदार दिलीप मोहिते-पाटील यांनी राजगुरूनगर येथे केले.
हुतात्मा राजगुरु सोशल फाउंडेशन आयोजित हुतात्मा राजगुरू यांच्या जयंती निमित्ताने हुतात्मा राजगुरू पुरस्कार वितरण सोहळा राजगुरुनगर येथे पार पडला. यावेळी मोहिते पाटील बोलत होते. हुतात्मा राजगुरू सोशल फाउंडेशनच्या वतीने रांगोळीकार महादेव गोपाळे, रियल लाईफ रियल पीपल्स संस्थेचे एम. ए. हुसेन, चित्रकार राजाराम होले, पेपर विक्रेता ढमाले यांना हुतात्मा राजगुरू पुरस्कार देऊन सन्मानित करण्यात आले. सामाजिक कार्यकर्ते व सोशल फाउंडेशनचे संस्थापक अध्यक्ष कैलास दुधाळे यांना हुतात्मा राजगुरू सन्मानपत्र व राष्ट्रीय वेटलिफ्टिंगमध्ये विक्रम नोंदविणारे वैष्णव ठाकूर, सारिका शिनगारे, संस्कृती गिलबिले, मेघना मुसळे यांचाही विशेष सन्मान करण्यात आला.
आमदार मोहिते पाटील म्हणाले, समाजातील अनेक गरीब लोकांना मदत करण्याची भावना निर्माण झाल्यानंतर हुतात्मा राजगुरू सोशल फाउंडेशनची कैलास दुधाळे यांनी स्थापना केली. त्यात देणाऱ्या व्यक्तींचा समावेश केल्याने अनेक गरजू, गरीब दुःखी आणि आपत्तीग्रस्त लोकांना फाउंडेशनच्या माध्यमातून मदतीचा हात देण्यात आला. समाजात योगदान देणाऱ्या व्यक्तींची दखल फाउंडेशनने घेतली.
यावेळी जिल्हा परिषद अध्यक्षा निर्मला पानसरे, फाउंडेशनच्या अध्यक्षा मनीषा टाकळकर-पवळे, माजी सभापती अरुण चांभारे, विजया शिंदे, संपदा सांडभोर, अजित वाळुंज, बाळासाहेब सांडभोर, सचिन वाळुंज यांच्यासह फाउंडेशनचे सर्व पदाधिकारी नागरिक मोठ्या संख्येने उपस्थित होते. यावेळी पुरस्कार देण्यात आलेले महादेव गोपाळे, राजाराम होले एम. ए. शेख यांनी मनोगत व्यक्त केले. सूत्रसंचालन कैलास मुसळे यांनी तर आभार उपाध्यक्ष बाळासाहेब सांडभोर यांनी मानले.
२५राजगुरुनगर
पेपर विक्रेता सुरेश ढमाले यांचा हुतात्मा राजगुरू यांच्या जयंती निमित्ताने आमदार दिलीप मोहिते यांच्या हस्ते सन्मान केला.