भिगवण : जिल्ह्याचे पालकमंत्री गिरीश बापट यांनी भिगवणला सदिच्छा भेट दिली. या वेळी राष्ट्रवादी काँग्रेसचे अजित क्षीरसागर यांच्यासह कार्यकर्त्यांनी त्यांचे स्वागत केले. या वेळी आगामी जिल्हा परिषद निवडणुकांच्या पार्श्वभूमीवर ही भेट झाल्याने अनेकांच्या भुवया उंचावल्या आहेत.आगामी जिल्हा परिषद आणि पंचायत समिती निवडणूक संबंधित कार्यकर्त्यांच्या भेटीला इंदापूर येथे जात असलेले बापट यांनी भिगवणला सदिच्छा भेट दिली. या वेळी त्यांच्यासोबत भाजपा आमदार बाळा भेगड हे होते. या वेळी बापट यांनी आपले जुने साथीदार अजित क्षीरसागर यांची भेट घेतली. तर, त्यांच्यासोबत असणारे आमदार भेगडे यांनी अजित क्षीरसागर यांना भाजपामध्ये येण्याचे आमंत्रण दिले. राष्ट्रवादी पक्षाचे खंदे समर्थक असलेले क्षीरसागर यांनी मात्र या बाबतीत कोणतीही प्रतिक्रिया दिली नाही. तरीही, जिल्हा परिषद निवडणुकीसाठी प्रबळ दावेदार असलेले क्षीरसागर यांना भाजपात निमंत्रण दिल्याने अनेकांच्या भुवया उंचावल्या. या वेळी भिगवण परिसरातील अनेक कार्यकर्ते बापट यांना भेटण्यास आले होते. या वेळी मारुती वणवे, तुषार क्षीरसागर, नंदू नरुटे, नाना पवार, माऊली मारकड, गणेश जराड, दिनेश मारणे, दिलीप कुंभार, गणेश जमदाडे, संजय भरणे, प्रसाद क्षीरसागर यांनी बापट यांची भेट घेतली. या वेळी क्षीरसागर यांच्या घरातील सुवासिनींनी बापट यांचे औक्षण केले. निघताना, आपण क्षीरसागर यांच्या घरी भोजनासाठी थांबणार असल्याचे सांगून त्यांनी निरोप घेतला.
पालकमंत्र्यांची भिगवणला भेट
By admin | Updated: July 12, 2016 01:49 IST