पुणे : भरधाव मोटारीच्या धडकेने दुचाकीस्वाराचा मृत्यू झाला. सेनापती बापट रस्त्यावर ही घटना घडली. याप्रकरणी चालकास अटक करण्यात आली आहे.
सुजीत हनमंत जोशी (वय ४७, रा. दीपाली सोसायटी, आनंदनगर, सिंहगड रस्ता) असे मृत्युमुखी पडलेल्या दुचाकीस्वाराचे नाव आहे. या प्रकरणी चालक वरुण कुलकर्णी (वय २६, रा. बावधन) याला अटक करण्यात आली. अभिजित जोशी (वय ५२, रा. रूद्र सोसायटी, माणिकबाग, सिंहगड रस्ता) यांनी यासंदर्भात चतु:शृंगी पोलीस ठाण्यात फिर्याद दिली आहे. गुरुवारी (दि.२६) रात्री पावणेदहाच्या सुमारास दुचाकीस्वार सुजित जोशी सेनापती बापट रस्त्याने निघाले होते. सेनापती बापट रस्त्यावरून विद्यापीठ चौकाकडे भरधाव वेगाने जाणा-या मोटारीने वेताळबाबा चौकात दुचाकीस्वार जोशी यांना धडक दिली. अपघातात गंभीर जखमी झालेल्या जोशी यांना रुग्णालयात दाखल करण्यात आले. उपचारादरम्यान त्यांचा मृत्यू झाला. सहायक पोलीस निरीक्षक लक्ष्मण उकिर्डे तपास करत आहेत.