पुणे : पूर्ववैमनस्यातून तरुणावर कोयत्याने वार करून जिवे ठार मारणाऱ्याचा प्रयत्न करणाऱ्या दोघा सख्ख्या अल्पवयीन भावांना भारती विद्यापीठ पोलिसांनी ताब्यात घेतले.
याप्रकरणी मनीषा दिसले (रा़ श्रीपाद हाईटस, जांभुळवाडी) यांनी भारती विद्यापीठ पोलिसांकडे फिर्याद दिली आहे़ दिसले यांचा मुलगा रवींद्र राजेंद्र दिसले (वय १८) हा २४ मे रोजी रात्री साडेआठ वाजता आंबेगाव खुर्द येथील ओढ्यात मित्रांबरोबर गेला होता़ जुन्या भांडणाच्या कारणावरून दोघा अल्पवयीन भावांनी राजेंद्र याच्या डोक्यावर, हाताचे मनगटावर, पाठीवर कोयत्याने वार करून जिवे मारण्याचा प्रयत्न केला़ गंभीर जखमी झालेल्या रवींद्र याच्यावर उपचार करण्यात येत आहे़
भारती विद्यापीठ पोलीस ठाण्यातील तपास पथकातील अंमलदार गणेश सुतार व शिवदत्त गायकवाड यांना ही अल्पवयीन मुले धायरेश्वर मंदिराजवळ येणार असल्याची माहिती मिळाली़ त्यानुसार वरिष्ठ पोलीस निरीक्षक जगन्नाथ कळसकर यांच्या सूचनेनुसार मंदिराजवळ सापळा रचून दोघांना पकडण्यात आले़ रवींद्र याने काही दिवसांपूर्वी त्यांना मारहाण केली होती़ त्या कारणावरून हल्ला केल्याचे या दोघांनी सांगितले़ पोलीस निरीक्षक संगीता यादव अधिक तपास करीत आहेत.