‘लोकमत’च्या ‘प्रोफेशनल आयकॉन्स आॅफ पीसीएमसी’चे आज प्रकाशन

उद्योगनगरी पिंपरी- चिंचवड च्या विकासात महत्वाचे योगदान असलेल्या व्यावसायिकांच्या यशोगाथा उलगडणाऱ्या लोकमत माध्यम समुहाच्या ‘प्रोफेशनल आयकॉन्स आॅफ पीसीएमसी’

पिंपरी : उद्योगनगरी पिंपरी- चिंचवड च्या विकासात महत्वाचे योगदान असलेल्या व्यावसायिकांच्या यशोगाथा उलगडणाऱ्या लोकमत माध्यम समुहाच्या ‘प्रोफेशनल आयकॉन्स आॅफ पीसीएमसी’ या कॉफीटेबल बुकचे प्रकाशन उद्या (रविवारी) होणार आहे. पुण्यातील जे डब्ल्यू मॅरिअट येथे दुपारी तीन वजाता होणार आहे. वाहतूक व खार जमीन विकास मंत्री दिवाकर रावते प्रमुख पाहुणे म्हणून उपस्थित राहणार आहेत. सिनियर सर्जन डॉ. मुफझल लाकडवाला, खासदार अनिल शिरोळे, श्रीरंग बारणे, संजय काकडे, अमर साबळे यांची विशेष उपस्थित असणार आहे. लोकमत मीडिया ग्रुपचे अध्यक्ष विजय दर्डा अध्यक्षस्थानी आहेत.गाव ते महानगर असा पिंपरी- चिंचवड शहराचा झपाट्याने होणा-या विकासाचा आलेख स्तिमीत करणारा आहे. यामध्ये येथील डॉक्टर, इंजिनियर, वकील, कलावंत, शिक्षण तज्ञ, आर्किटेक्ट, उद्योजक, बांधकाम व्यावसायिक यांचे योगदान महत्वाचे आहे. त्यांचा गौरव यानिमित्ताने होणार आहे. प्रगतीची शिखरे पाहत तरुणांनाही त्या दृष्टीने वाटचाल करण्यासाठी प्रेरणा मिळावी यासाठी ‘लोकमत’च्या वतीने ‘आयकॉन्स’ ही कॉफीटेबल बुकची मालिका सुरू करण्यात आली आहे. सत्कर्मी विचारांच्या अभिव्यक्तीचा जागर व्हावा आणि उद्याचे भविष्य घडविणाऱ्या नव्या पिढीला प्रेरणा - प्रोत्साहन मिळावे हा या कॉफी टेबल ग्रुपचा उद्देश आहे. यशोशिखरावर पोहोचलेल्या मान्यवरांची गौरवगाथा आणि भव्य अनावरण सोहळा रविवारी होणार आहे. या समारंभास मान्यवरांनी उपस्थित रहावे, असे आवाहन ‘लोकमत’चे संपादक विजय बाविस्कर व वरिष्ठ महाव्यवस्थापक निनाद देसाई यांनी केले आहे. हा कार्यक्रम फक्त निमंत्रितांसाठीच असून, प्रवेशावेळी निमंत्रणपत्रिका आवश्यक आहे. आर. डी. देशपांडे होल्डींगज यांनी हा कार्यक्रम प्रस्तुत केला असून, आॅडी उद्योग समूह सहप्रायोजक आहे. (प्रतिनिधी)