लोकमत न्यूज नेटवर्कजेजुरी : पुणे-पंढरपूर मार्गावर जेजुरी नजीक दौंडजखिंडीत पवारवाडी फाट्यावर अल्टो गाडी व ट्रक यांची समोरासमोर धडक झाल्याने अल्टोतील तीन जण ठार झाले. हा अपघात शुक्रवारी रात्री पावणेबाराला झाला. ट्रक चालकाला जेजुरी पोलिसांनी अटक केली आहे.मनोज गोविंद जाधव (वय ३५), चंद्रशेखर वसंत फडतरे (वय ३८) धनाजी एकनाथ घोरपडे (वय ४०, तिघेही रा. पाडेगाव ता.फलटण, जि. सातारा) या तिघांचा अपघातामध्ये मृत्यू झाला. ट्रकचालक संदीप सुदाम आजबे (वय २४) रा. मंतरवाडी, पुणे, ता. हवेली) यांना जेजुरी पोलिसांनी अटक केली.धनाजी घोरपडे यांच्या अल्टो (एमएच १२/सीआर ६८२५) गाडीतून जेजुरीकडून नीरेकडे जात होते. शुक्रवारी रात्री पावणेबारा वाजण्याच्या सुमारास दौंडज खिंडीत पवारवाडी फाट्याजवळ नीरेकडून जेजुरीकडे येणारा ट्रकची (एमएच १२/सीटी ८४८७) समोरासमोर धडक झाली. भरधाव वेगात ट्रक असल्याने मोठा अपघात झाला. कारमधील दोन जण जागीच ठार झाले. पोलिसांना खबर मिळताच जेजुरी पोलीस तातडीने हजर झाले. अपघातस्थळी पोहोचले तेव्हा दोन जण जागीच ठार झाले होते तर गंभीर जखमी असलेल्या धनाजी घोरपडे यांना जेजुरीत खाजगी रुग्णालयात दाखल करण्यात आले होते.उपचारा दरम्यान धनाजी घोरपडे यांचाही मृत्यू झाला. अपघाताची खबर न देता निघून जात असताना ट्रकचालक संदीप सुदाम आजबे याला जेजुरी पोलिसांनी ताब्यात घेतले. अधिक तपास जेजुरी पोलीस ठाण्याचे सहायक पोलीस निरीक्षक रामदास वाकोडे करीत आहेत.तिघेही पाडेगावचे राहणारे असल्याने पाडेगाव परिसरातील ग्रामस्थ हळहळ व्यक्त करीत आहेत. पाडेगावचे नागरिक शवविच्छेदनाच्या वेळी गर्दी करून होते. दुपारी तिघांचेही शवविच्छेदन करून नातेवाईकांच्या ताब्यात देण्यात आले.
दौंडज खिंडीत अपघातात ३ ठार
By admin | Updated: July 2, 2017 02:19 IST