पुणे : मुलगा कुठे अशी विचारणा करीत घरातील साहित्य फेकून देत एका मुलावर पूर्ववैमनस्यातून कोयत्याने वार करून जिवे मारण्याचा प्रयत्न केल्याप्रकरणी मार्केट यार्ड पोलिसांनी तिघांना अटक केली. न्यायालयाने त्यांना २७ एप्रिलपर्यंत पोलीस कोठडीत ठेवण्याचा आदेश दिला.
अरबाज शेख (वय २१), सलमान शेख (वय १९), सतीश सिरसाट (वय २०) अशी अटक केलेल्याची नावे आहेत. याबाबत ४५ वर्षीय महिलेने फिर्याद दिली आहे. २२ एप्रिल रोजी मार्केटयार्ड परिसरात ही घटना घडली.
फिर्यादी यांचा मुलगा आणि आरोपी यांच्यात पूर्वी भांडण झाले होते. याच कारणावरून आरोपी कोयते, धारधार शस्त्र घेऊन फिर्यादीच्या घरी येऊन मुलगा कुठे अशी विचारणा करत त्यांच्या घरातील साहित्य फेकून दिले. दरम्यान, फिर्यादीचा मुलगा घरी परतत असताना त्याला रस्त्यात अडवून त्याच्या डोक्यात, हातावर कोयत्याने वार करून गंभीर जखमी केले, असे फिर्यादीत नमूद करण्यात आले आहे. या प्रकरणी तिघांना न्यायालयात हजर केले असता, गुन्ह्यातील हत्यारे जप्त करण्यासाठी, त्याचा आणखी कोणी साथीदार आहे का? गुन्ह्यातील हत्यारे त्यांनी कोठून आणली? यासह गुन्ह्याच्या तपासासाठी त्यांना पोलीस कोठडी देण्याची मागणी सरकारी वकील ज्ञानेश्वर मोरे यांनी केली.