पुणे : खरेदीचा बहाणा करून अनेक चोरटे दुकानदाराला एका बाजूला गुंगवून शोकेसमधील सोन्याचे दागिने नजर चुकवून लंपास करण्याचे प्रकार नेहमीच घडतात. सीसीटीव्हीमध्ये अशा चोऱ्या कैद झाल्याचे यापूर्वी दिसून आले आहे; पण एका चोरट्याने त्यावरही कडी केली.
खरेदीसाठी आल्याचा बहाणा करताना हातात सोनसाखळी घेऊन चोरट्याने दुकानातून पलायन केले. साथीदाराच्या दुचाकीवर बसून सर्वांदेखत चोरट्याने पळ काढला. ही घटना धनकवडी येथील बालाजीनगरमधील ललित सराफ ज्वेलर्स या दुकाना शुक्रवारी सकाळी सव्वादहा वाजता घडली.
याप्रकरणी ललित गांधी (वय ४३, रा. धनकवडी) यांनी सहकारनगर पोलिसांकडे फिर्याद दिली. गांधी हे दुकानात असताना एक जण सोने खरेदीसाठी दुकानात आला. त्याला सोनसाखळी दाखविली. तेव्हा त्याने ती पाहण्यासाठी हातात घेतली. कोणाला काही समजायच्या आत तो ६६ हजार रुपयांची सोनसाखळी घेऊन दुकानाच्या बाहेर वेगाने पळाला. बाहेर उभ्या असलेल्या साथीदाराच्या मोटारसायकलवर बसून ते दोघे कात्रजच्या दिशेने पळून गेले. पोलीस उपनिरीक्षक सुधीर घाडगे अधिक तपास करीत आहेत.