या निर्णयाचे स्वागत असले तरी लाखोंची उलाढाल थांबली असून, छोट्या मोठ्या व्यापाऱ्यांना ह्या बंदचा तोटा सहन करावा लागला आहे.
आंबेगाव तालुक्याच्या पश्चिम आदिवासी भागात असणाऱ्या भीमाशंकर, पाटण व आहुपे खोऱ्यामध्ये तळेघर येथील एकमेव आठवडे बाजार आहे. त्यामुळे या तीनही खोऱ्यांतील आदिवासी बांधवांनी होळी या सणानिमित्त खरेदी करण्यासाठी लगबग असते. तळेघर येथे बाजारासाठी विविध ठिकाणाहून व्यापारी आदल्या दिवशीच रात्री मुक्कामी येत असतात. मात्र यंदाच्या वर्षी कोरोनाच्या सावटामुळे बाजार भरला नाही.
आदिवासी भागामध्ये होळीच्या बाजाराला पारंपरिक भाषेमध्ये "शिमग्याचा बाजार" असे म्हणतात. बारा महिन्यांतील बैलपोळा व होळी या दोन सणांसाठी होणाऱ्या आठवडे बाजारांमध्ये मोठ्या प्रमाणात उलाढाल होत असते.
भीमाशंकर पाटण व आहुपे त्याचप्रमाणे कोकणातील व जुन्नर खेड तालुक्यातील अनेक नागरिक तळेघर येथील होळीच्या आठवडे बाजारामध्ये गूळ, डाळ, खोबरे, लाल मिरच्या, तेलाचे डबे खरेदी करण्यासाठी येत असतात. या बाजाराचे वैशिष्ट्य म्हणजे कोकणी बांधव हे आपल्या भागात पिकणारे कडधान्य सिडीघाट व बैल घाटाने डोक्यावर घेऊन येतात. आपले कडधान्य व्यापाऱ्यांना देऊन या मोबदल्यात लाल मिरच्या गोड तेल डबे व इतर साहित्य खरेदी करतात. ही देवाणघेवाणची प्रथा गेले कित्येक वर्षांपासून आजतागायत टिकून आहे.
मात्र यंदाच्या वर्षी कोरोनाच्या पार्श्वभूमीवर आदिवासी भागातील आठवडे बाजार बंद ठेवण्यात आला आहे. नागरिकांनी स्वतःची काळजी घेण्याचे आवाहन तळेघरचे सरपंच चंद्रकांत उगले व स्थानिक ग्रामस्थांकडून करण्यात येत आहे.
कोरोनाच्या पार्श्वभूमीवर बंद ठेवण्यात आलेला तळेघर (आंबेगाव) येथील आठवडे बाजार.
( छायाचिञ संतोष जाधव )