पुणे : दहशत करण्यासाठी पिस्तुल बाळगणाऱ्या तडीपार गुंडाला दत्तवाडी पोलिसांनी ताब्यात घेतले असून त्याच्याकडून देशी बनावटीचे पिस्तुल व काडतुस जप्त केले. रोहित विजय अवचरे (रा. शाहू वसाहत, लक्ष्मीनगर, पर्वती) असे अटक केलेल्याचे नाव आहे. अवचरे याच्याविरोधात खुनाचा प्रयत्न, मारामारी, दहशत करणे असे गंभीर स्वरुपाचे गुन्हे दाखल असून त्याला शहरातून एक वर्षांसाठी तडीपार केले होते.
तडीपार केल्यानंतर अवचरे अरण्येश्वर भागात पिस्तुल घेऊन दहशत निर्माण करण्यासाठी येणार असल्याची माहिती तपास पथकातील पोलीस कर्मचारी अक्षयकुमार वाबळे, नवनाथ भोसले व कुंदन शिंदे यांना मिळाली असता त्यांनी सापळा रचून अवचरेला पकडले व त्याच्याकडून पिस्तुलासह एक काडतुस जप्त केले.
वरिष्ठ पोलीस निरीक्षक कृष्णा इंदलकर, गुन्हे शाखेचे निरीक्षक विजय खोमणे यांच्या मार्गदर्शनाखाली उपनिरीक्षक स्वप्नील लोहार, सुधीर घोटकुले, महेश गाढवे, अमित सुर्वे, सागर सुतकर, राहुल ओलेकर यांनी ही कारवाई केली.